Morten Nornild Ilisimatusarfimmi avataaniit inatsisilerinermik ilinniartitsisuuvoq ulluinnarnilu Naalagaaffiup sinniisoqarfiani inatsisilerinermi pisortaalluni.Assi: KNR

Inatsisilerinermik sulialik: Annertuumik innarluutillip anaanaa tusaaneqartariaqarpoq

Arnap 23-nik ukiullip innaarluuteqaqisup uissuummissutaqisumik meerartaareernerani ulloq unnuarlu angerlarsimaffimmut najugarisaanut utertinneqarnera ananaasup kissaataanut napertuutinngitsoq, anaanasoq KNR-imut erseqqissaavoq.

Anaanaasulli kissaatai tusaaneqartariaqartut, Ilisimatusarfimmi inatsisilerinermut tunngatillugu avataaniit ilinniartitsisoq aammalu Naalagaaffiup sinniisoqarfiani inatsisilerinermi pisortaq, Morten Nornild naliliivoq.

- Pisumi matumani, pinerluttoqarsimanera aallaavigalugu, inuiaqatigiittut tamatta isumaqatigiissutigisinnaagunarparput arnaq inuusuttoq annertuumik innarluutilik inuiaqatigiittut sumiginnarsimagipput. Morten Nornild KNR-imut oqarpoq.

Pisoq pillugu:
 

23-nik ukiulik annertuumik innarluutillip naartunera ilisimaneqarnani ernertaarpoq. 

 

Arnaq oqalussinnaanngilaq, arnarlu paarnguttuullunilu nanginik atugaqartuuvoq.

 

Innarluutillit angerlarsimaffianni najugalimmik kinguaassiutitigut atornerluisoqarsimaneranik politiinut nalunaaruteqartoqarpoq.

 

Isumaginninnermut Aqutsisoqarfik Qaqortumukarluni Ivaaqqami sulisunik aqutsisunillu oqaloqatiginnikkiartorpoq.

 

Angajoqqallu ilaat Qaqortumukarlutik pisumut malinnaatinneqarput.

Taamatuttaaq annertuumik innarluutilimmut anaanaasoq Maibritt Lothsen panini sinnerlugu aalajangiisinnaatitaasoq, noqqaagaluarpoq panini Ivaaqqamut uteqqinngisaannassasoq.

- Kissaatigigaluarpara paniga Ivaaqqamut uteqqinngisaannassasoq, panimma mittatigineqarnera naammaqimmat, Maibritt Lothsen KNR-imut oqarpoq.

AAMMA ATUARUK Maibritt Lothsen: Paniga Ivaaqqamut uteqqissanngilaq

Taassumali kissaataa malinneqanngilaq, taamaammallu maibritt pisortanit tusaaniarneqanngitsutut misigisimavoq, tassami pania ulloq unnuarlu angerlarsimaffimmut utertinneqarsimalereerpoq.

Morten Nornild: Anaanaasoq tusaaneqarnissaminut pisinnaatitaaffeqarpoq

- Soorunami annertuumik innarluutilimmut anaanaasoq paninnilu sinnerlugu aalajangiisinnaatitaasoq, pisortat ingerlatsinerat pillugu inatsisitigut malitassat nalinginnaasut tunngavigalugit tusaaneqarnissaminut pisinnaatitaaffeqarpoq.

Maibritt Lothsen annertuumik innarluutilimmut anaanaasoq tusaaneqarusuppoq Maibritt Lothsen annertuumik innarluutilimmut anaanaasoq tusaaneqarusuppoq

- Tassa qularnaatsumik pisortat ingerlatsineranni inatsisitigut malitassat malillugit kommunit sulisussaapput, taamaammat anaanaasoq qaangiataarneqartussaanngilaq, Morten Nornild KNR-imut erseqqissaavoq.

Taamaattorli pisortat naapertorlugit arnaq inuusuttoq allamut inissiffissaqartinneqarsimanngimmat Ivaaqqamut utertinneqareerpoq. Maibritt Lothsen-ilu allatut iliorsinnaanngilaq politiit misissuinerisa inernera utaqqisariaqassavaa, tassami politiit misissuinerisa kingunerisaanik akisussaatitsisoqarsinnaanersoq ersarississammat.

Politiit misissuinerat utaqqineqartariaqarpoq

- Tamannarpiaavoq paasisinnaasakka malillugit politiit misissugaat, tassa pinerluttoqarsimanera qanoq pisimanersoq qularnaatsumik paasineqarnissaa, tamannalu pereerpat aatsaat erseqqississaaq akisussaaffimmik inissiisoqassanersoq aammalu Ivaaqqami sulisunut kinguneqartitsisoqassanersoq.

- Piffissalli imaalinerani politiit misissuinerat aammalu Isumaginninnermut Aqutsisoqarfiup Ivaaqqami ingerlatsineq pillugu suliamik ingerlatsinera utaqqimaarneqartariaqarput, anaanaasup panini sinnerlugu inatsisitigut pisinnaatitaaffimmigut ajornakusoortinneqarnera iluamik qulaarneqarsinnaalissammat, Ilisimatusarfimmi inatsisilerinermut tunngatillugu avataaniit ilinniartitsisoq aammalu Naalagaaffiup sinniisoqarfiani inatsisilerinermi pisortaq, Morten Nornild naliliivoq.
 

KNR-imit Isumaginninnermut Aqutsisoqarfik aammalu Meeqqanut, Inuusuttunut Ilaqutariinnullu Naalakkersuisoqarfik piffissami sivitsortumi oqaaseqartinniarlugit pissarsiariniaraluarpagut sulili iluatsinngilagut.

 

  • Kalaallit Nunaanni politiit Ivaaqqami kinguaassiutitigut atornerluisoqarsimasoq nalunaarfigineqarsimallutik uppernarsarpaat, tamannalu pillugu maanna paasiniaaleruttorput. 
  • Meeqqanut, Inuusuttunut Ilaqutariinnut, Peqqissutsimullu naalakkersuisup Mimi Karlsenip (IA) Ivaaqqami pisoq aallaavigalugu nunatsinni tamarmi ulloq unnuarlu angerlarsimaffinni misissuisoqarnissaanik aallartitsilluni KNR-imut septembarip tallimaanni oqaatigaa.
  • Tilioq Inuillu pisinnaatitaaffii pillugit suliniaqatigiiffik pisoq pillugu isornartorsiuingaatsiarput, Inuit pisinnaatitaaffii pillugit suliniaqatigiiffiup tamanna inuit pisinnaatitaaffiinik unioqqutitsioqarfiusoq ilaatigut oqaatigaa.


Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl