Maibritt Lothsen: Paniga Ivaaqqamut uteqqissanngilaq
Maibritt Lothsen panini, nammineq imminut illersorsinnaanngitsoq aammalu nammineq taassumunnga annertuumik innarluutilimmut 23-nik ukiulimmut anaanaasutut pisortanik qanoq pineqarnertik pillugu assut erloqivoq.
Anaanaasoq sakkortoorujussuarmik nalaataqartitaanertik pillugu erloqissutimik qaavatigut suli erloqinerulersitaasinnaanertik pillugu aarleqquteqarpoq.
Maibritt Lothsen-imi aalajangerpoq panini ulloq unnuarlu angerlarsimaffimmi Ivaaqqameeqqissanngitsoq. Taamaattorli ilisimatinneqarpoq nunatsinni allami inissiffissaqanngitsoq, allamullu inissinneqassaguni Danmarkimut nuutsinneqarnissaa kisimi periarfissaasoq.
AAMMA ATUARUK Annertuumik innarluutilik tallimanngormat erneriasaarpoq – ulloq unnuarlu angerlarsimaffik politiinut nalunaarutigineqarpoq
- Ilisimatinneqarpunga panimma paarineqarnissaanut nunatsinni allamik periarfissaqanngitsoq. paasitinneqarpungami annertuumik innarluutillit nangeqartariaqartullu nunatsinni allami inissiffissaqartinneqanngitsut taamaammallu periarfissatuarput tassaasoq panimma Danmarkimut nuutsinneqarnissaa, Maibritt Lothsen KNR-imut oqaluttuarpoq.
Panini nunatsinni tikilluaqqusaanngitsoq misigisimavoq
Maibritt Lothsen-ip paasisinnaannginnerarpaa nunatsinni allanik periarfissaqartitsisoqanngitsoq, apeqquserpaalu ilumut periarfissaqannginnersoq, taassumami arlaannaatigulluunniit panimmi Danmarkimut nuutsinneqarnissaa takorloorsinnaannginnerarpaa:
Pisoq pillugu:
23-nik ukiulik annertuumik innarluutillip naartunera ilisimaneqarnani ernertaarpoq.
Arnaq oqalussinnaanngilaq, arnarlu paarnguttuullunilu nanginik atugaqartuuvoq.
Innarluutillit angerlarsimaffianni najugalimmik kinguaassiutitigut atornerluisoqarsimaneranik politiinut nalunaaruteqartoqarpoq.
Isumaginninnermut Aqutsisoqarfik Qaqortumukarluni Ivaaqqami sulisunik aqutsisunillu oqaloqatiginnikkiartorpoq.
Angajoqqallu ilaat Qaqortumukarlutik pisumut malinnaatinneqarput,
- Paniga kalaaliuvoq, ilaqutai sorlaqarfiilu nunatsinniipput, pilliuteqareeqaaq qaavatigullu Danmarkimut nuutsitaassappat uagutsinnut misigisat nuanniitsut suli ilasarneqaannassapput. Illoqarfimmi inunngorfimmini tikilluaqqusaanngilaq aamma nunamini tikilluaqqusaanngilaq annertuumik innarluuteqarnini piinnarlugu, allaat misigisimavunga panigalu pillagaasugut annertuumik innarluuteqarmat, Maibritt Lothsen KNR-imut oqaluttuarpoq.
Nooqataassaguni nammineq akilissavaa
Maibritt Lothsen, panini 23-nik ukiulik sinnerlugu oqaasissaqartitaasoq oqaatigineqareersutut aalajangersimavoq panini Ivaaqqamut uteqqissanngitsoq. Tamanna aamma tunngavigalugu pania suli Qaqortumi napparsimavimmiippoq.
AAMMA ATUARUK Laura Taunajik Uitsatikitseq: Paniga Ivaaqqamiiginnassappat angummik unnuarsiortoqartassanngilaq
Tamatumalu saniatigut ilimasaarneqarsimavoq Maibritt aalajangissaguni panini Danmarkimut nuussasoq namminerlu nooqataassaguni nammineq akisussaaffigisariaqassagaa pania annertuumik innarluutilik 18-it sinnerlugit ukioqarmat.
Innarluutilinnut ulloq unnuarlu angerlarsimaffiit ingerlanneqarnerinut akisussaasumit, Isumaginninnermut aqutsisoqarfimmit aammalu Meeqqanut, Inuusuttunut Ilaqutariinnullu Naalakkersuisoqarfimmit KNR-imit oqaaseqartitsiniaraluaratta iluatsinngilarput.
- Kalaallit Nunaanni politiit Ivaaqqami kinguaassiutitigut atornerluisoqarsimasoq nalunaarfigineqarsimallutik uppernarsarpaat, tamannalu pillugu maanna paasiniaaleruttorput.
- Meeqqanut, Inuusuttunut Ilaqutariinnut, Peqqissutsimullu naalakkersuisup Mimi Karlsenip (IA) Ivaaqqami pisoq aallaavigalugu nunatsinni tamarmi ulloq unnuarlu angerlarsimaffinni misissuisoqarnissaanik aallartitsilluni KNR-imut septembarip tallimaanni oqaatigaa.
- Tilioq Inuillu pisinnaatitaaffii pillugit suliniaqatigiiffik pisoq pillugu isornartorsiuingaatsiarput, Inuit pisinnaatitaaffii pillugit suliniaqatigiiffiup tamanna inuit pisinnaatitaaffiinik unioqqutitsioqarfiusoq ilaatigut oqaatigaa.
