Mimi Karlsen innarluutillip meerartaarnera pillugu: Eqqaaniissimasut tamarmik misissuiffigineqassapput

Arnaq inuusuttoq annertuumik innarluutilik 23-nik ukiulik innarluutillit angerlarsimaffianni Ivaaqqami Qaqortumiittumi najugalik tallimanngormat meerartaariasaarpoq.

Tamanna pillugu innarluutillit angerlarsimaffiat Qaqortumiittoq, Ivaaraq, kinguaassiutitigut atornerluisoqarsimanerarlugu politiinut nalunaarutigineqarpoq.

Niviarsiannguup annertuumik innarluutillip Qaqortumi Ivaaqqamiittup naartusimanera tallimanngormallu erneriataarnera aamma Naalakkersuisunik aalassatsitsivoq.

AAMMA ATUARUK Annertuumik innarluutilik tallimanngormat erneriasaarpoq – ulloq unnuarlu angerlarsimaffik politiinut nalunaarutigineqarpoq

Nuna tamakkerlugu innarluutilinnut ulloq unnuarlu angerlarsimaffiit tamarmik misissuiffigineqalersut Meeqqanut, Inuusuttunut Ilaqutariinnullu Naalakkersuisoq Mimi Karlsen (IA) oqarpoq:

- Una tusagaq alianartoq naalakkersuisuniit sakkortoorujussuarmik tiguarput. Pisoq alianaqaaq nunarsuarmi sumiluunniit taama pisoqartussaanngikkaluarpoq, taamaattorlu uagut nalaapparput.

Isumaginninnermut naalakkersuisoq, ulloq unnuarlu angerlarsimaffinnut akisussaanerpaasoq taama oqarpoq.

 Nuna tamakkerlugu angerlarsimaffiit misissuiffigineqassasut Mimi Karlsen, Inuit Ataqatigiinneersoq aamma erseqqissaavoq

Angajoqqaat innarluutilinnik meerallit toqqussisimassapput

- Pisoq politiinut ullumi suliakkiissutigivara. Meeqqanut angerlarsimaffiutitsinnut assigiinngitsunik tamaniittuni misissuineq aallartinneqassaaq ilumut maleruaqqusat malinneqarnersut misissorneqassallutik.

- Ingammillu meeqqanut atornerluisimannginnermut uppernarsaatit pigineqarnersut. Aamma nangeqarpata, nangilersuinermi inuit marluk peqataasarnissaanik piumasaqaatit malinneqarnersut misissorneqassaaq.

- Taamaalilluta aamma angajoqqaat toqqissisimatinneqarsinnaaneri angujumallugit taamatut iliuuseqassaagut.

Mimi Karlsen aamma erseqqissaavoq Ivaaqqami sulisut tupassimaqisut qitiusumit ikiorneqartut ikorfartorneqarlutillu, nangipporlu:

- Politiit misissuineri tassa taakku aallaavigissavagut. Aamma uuma niviarsiannguup imminut illersorsinnaanngitsup eqqaaniissimasut kikkut tamarmik nalunaarsorneqassapput taamaalilluni tassuuna paasinarsissalluni.

Anaanaasoq isumaalulluni kimigiisersimagaluarpoq panini iluamik misissorneqassasoq, sooruna taama annertutigisumik sumiginnaasoqarsinnaasoq?

- Uani aamma nakorsaqarfiup pisussaaffia uani tikinneqarpoq, tassanilu aamma taama sakkortutigisumik pisoqarmat nakorsaqarfimmi aamma misissuisoqartariaqarpoq, taavalu susoqarsimanersoq. Tamanna aamma suliakkiissutigissavara, Meeqqanut, Inuusuttunut Ilaqutariinnullu Naalakkersuisoq, Mimi Karlsen KNR-imut oqarpoq.

Qaqortumi politiit KNR-imut uppernarsarpaat kinguaassiutitigut atornerluisoqartarsimasinnaanera pillugu politiinut nalunaarutiginnittoqarsimasoq.

Nunap immikkoortuani politiit pisortaat Søren Hansen annerusumik oqaaseqarsinnaanngikkallarnerarpoq pinerluttoqarsimaneranik paasiniaasoqarmat.