Annertuumik innarluutilik tallimanngormat erneriasaarpoq – ulloq unnuarlu angerlarsimaffik politiinut nalunaarutigineqarpoq

Arnaq inuusuttoq annertuumik innarluutilik 23-nik ukiulik innarluutillillu angerlarsimaffianni Ivaaqqami Qaqortumiittumi najugaqarpoq.

Taanna kinguaassiutitigut atornerlunneqartarsimarpasippoq naartulersinneqarsimavormi, tallimanngormat nukappiaqqamik ernilluni.

Qaqortumi politiit uppernarsarpaat kinguaassiutitigut atornerluisoqartarsimasinnaanera pillugu politiinut nalunaarutiginnittoqarsimasoq. Nunap immikkoortuani politiit pisortaat Søren Hansen annerusumik oqaaseqarsinnaanngikkallarnerarpoq pinerluttoqarsimaneranik paasiniaasoqarmat.

Annertuumik innarluuteqartup anaanaa Maibritt Lothsen naapertorlugu Innarluutillit angerlarsimaffiat Ivaaraq nassuiaaniarnissaminik annertuumik ajornartorsiuteqarpoq.

"Aanaajuna aggertoq?"

Maibritt piffissami sivisuumi panimmi peqqissusaa pillugu annertuumik ernumassuteqarsimavoq, paniami oqalussinnaanngilaq, naalungiatut paarngunnialerlaatut paarngussinnaavoq nangeqartuartuullunilu, piffissamilu kingullermi puallariartorlunilu naavi pullakkaluttuinnarsimapput. Maibritt Arlaleriarluni Ivaaqqami aqutsisunut saaffiginnittaraluarpoq panini peqqiilliuuteqartutut pissuseqarmat.

Tallimanngormalli tuparujussuartinneqarpoq, pania Ivaaqqamiit Qaqortumi napparsimavimmut nuutsinneqariasaarpoq. Maibritt Lothsen tupaqqaqaluni paasiniaagaluarpoq panini sunersoq aamma tassanngaannaq napparsimavimmut unitsinneqarnera sumik pissuteqarnersoq paaserusullugu, taamaattorli Ivaaqqami sulisut saaffigisaralui tamarmik oqaaseqarumasimanngitsut Maibritt KNR-imut oqaluttuarpoq.

- Assorujussuaq tupaqqavunga nalaatsornerinnakkut paasigakku paninga napparsimavimmut unitsinneqarsimasoq. Isumaqarlunga annaalerlugu, tassami kinguaassiutitigut atornerlunneqartarsimanissaa qanorluunniit takorloorsinnaanngilluinnarpara, taamaammat isumaliorpunga tingui suliunnaarsimassasut taamaammallu naavi pullarujussuartut, Maibritt Lothsen oqarpoq.

- Ivaaqqami sulisut tamarmik oqaluttuukkumanngilaannga susoqarnersoq aammalu paniga takorusukkiga uninngavianut iseqqunngilluinnarpaannga.

- Napparsimaviulli gangersuaniit periarfissaqalerama arpaannaq inigisaanukarpunga. Aqqqutaani nakorsaq naapippara, taannalu aperivoq ”aanaajuna?” akivara naamik anaanaavunga, iserfigerusupparalu massakkut!” Nakorsalli arlaleriarluni aanaajunerarlunga sooq oqaqattaarnersoq aatsaat paasilerpara paninnguara nukappiaqqamik ernisimasoq paasitinneqarama, Maibritt Lothsen oqaluttuarpoq.

Kikkut tamarmik ilisimassavaat

Tuparujussuartitaanermi qaavatigut aamma tupatsinneqarpoq Qaqortumi isumaginnittoqarfimmit aperineqariasaarami naalungiarsuk paarerusunneraa:

- Paninnguara imminut illersorsinnaanngilaq, oqaluttuussinnaanngilaanga qanoq innerluni, taamaammallu oqaluttuussinnaanngilaanga kinguaassiutitigut atornerlunneqartarsimalluni naartulersinneqarsimallunilu. Naluara isumaginnittoqarfimmiut qanoq malussarniuteqarnersut, taamaattorli panimma atornerluisuta kinguaavata uannut isumagitinniarneqaraluarnera killissamik annertuumik qaangiineruvoq paasisinnaanngilaralu taamak aperineqarsinnaagama, Maibritt Lothsen suli tupaqqaqaluni tatitoqalunili oqaluttuarpoq:

- Nunatsinni tamanut aammalumi nunarsuarmioqatigiinnut oqaluttuarerusuppara innarluutillit angerlarsimaffianni paniga qanoq pineqarsimanersoq, taamaammat kinaassusera isertuukkusunngilara, tassami annertuumik innarluutillit nunatsinni qanoq pineqartarnerat akuerineqarsinnaanngilluinnarpoq aammalu assut ernumavunga annertuumik innarluutillit allat imminnut illersoriarsinnaanngitsut assinganik pileqartarsimasinnaammata, Maibritt Lothsen  erseqqissaavoq.