Laura Taunajik Uitsatikitseq: Paniga Ivaaqqamiiginnassappat angummik unnuarsiortoqartassanngilaq
Laura Taunaji Uitsatikitsip panini ornillugu maanna Qaqortumiippoq.
Taassuma panimi Ivaaqqamiiginnarnissaa maanna aalajangiuppaa. Piumasaqaateqarporli.
- Kissaatigilluinnaqqissaarpara angummik unnuarsiortoqanngisaannassasoq. Ersigaara, Laura Taunajik Uitsatikitseq oqarpoq.
Ineqartut misissorneqarput
Pisoq pillugu:
23-nik ukiulik annertuumik innarluutillip naartunera ilisimaneqarnani ernertaarpoq.
Arnaq oqalussinnaanngilaq, arnarlu paarnguttuullunilu nanginik atugaqartuuvoq.
Innarluutillit angerlarsimaffianni najugalimmik kinguaassiutitigut atornerluisoqarsimaneranik politiinut nalunaaruteqartoqarpoq.
Meeqqanut, Inuusuttunut Ilaqutariinnut, Peqqissutsimullu naalakkersuisup Mimi Karlsenip (IA) Ivaaqqami pisoq aallaavigalugu nunatsinni tamarmi ulloq unnuarlu angerlarsimaffinni misissuisoqarnissaanik aallartitsilluni KNR-imut septembarip tallimaanni oqaatigaa.
Isumaginninnermut Aqutsisoqarfik Qaqortumukarluni Ivaaqqami sulisunik aqutsisunillu oqaloqatiginnikkiartorpoq.
Angajoqqallu ilaat Qaqortumukarlutik pisumut malinnaatinneqarput,
Innarluutillit angerlarsimaffianni Ivaaqqami Qaqortumiittumi najuqartut ilaat arajutsineqartumik naartusimalluni meerartaariataarpoq.
Tamatumalu kingorna innuttaasut, oqartussat, suliffeqarfiillu qisuariaatinik ikigisassaanngitsunik saqqummiussuussipput.
Meeqqanut, Inuusuttunut, ilaqutariinnut peqqissutsimullu naalakkersuisup, Mimi Karlsenip pisup kingorna najugallit misissorneqassasut, tusagassiuutinut nalunaarutigaa.
Kingorna Isumaginninnermut Aqutsisoqarfiup akiligaanik angajoqqaat ilaat Qaqortumukartinneqarput oqaloqatigineqarlutillu.
AAMMA ATUARUK Laura Taunajik Uitsatikitseq nalornivoq: Paniga Ivaaqqamiitsiinnassanerpara?
Laura Taunajik Uitsatikitsillu panini misissortimmat najorpaa:
- Misissuinerit ullaaq aallartinneqarput panigalu siulliullugu misissorneqarpoq, misissorneqarneranilu paasivarput, soqanngilaq suneqarsimanngitsutut isikkoqarpoq.
Anaanaq nuannaaqisoq KNR-imut oqarluttuarpoq.
Angajoqqaaqatinilumi naapillugit eqqartueqatigisinnaallugit taassuma eqqissiallaatigaa.
- Misigissutsigut eqqartorpagut, pissutsit qanoq issimaneri eqqartorpagut, sorpassuit eqqartorpagut. Allaat inatsisit maannakkut piusut qanoq ittariaqarnerat.
Sulisut filmiliuutitigut nakkutigineqarlik!
- Aamma ineeqqat tamaavimmik pinngitsuuinnatik filmiliuummik nakkutilliissummik peqartariaqarput, takoreerparpummi qanoq pisoqarsinnaasoq.
- Meeqqanut innarliisimannginnermut uppernarsaat naammanngilaq, isit atorlugit, filmiliuut atorlugit nakkutilliisoqartariaqarpoq.
Laura Taunajik Uitsatikitsip Qaqortumiit marlunngorpat angerlaleruni paninni nassarniarpaa.
AAMMA ATUARUK Annertuumik innarluutilimmut anaanaasoq: Paniga Ivaaqqamut pulaaqqusaajunnaartarpara
Paninnilu tunumi peqatigereeruniuk Ivaaqqamut angerlarteqqinnissaa toqqissisimaffigalugu KNR-imut oqarpoq.
- Eqqaarusunngitsuunngilara aamma sulisorpassuaqarpoq ilai ukiorpassuarnik sulisimasut paninnut asannittut. Sulisoqarneq eqqarsaatigissagaanni suna tamarmik ajortuinnaanngilaq, tamannalu inuiaqatigiinnit tamanit paasineqartariaqartoq isumaqarpunga.
- Kalaallit Nunaanni politiit Ivaaqqami kinguaassiutitigut atornerluisoqarsimasoq nalunaarfigineqarsimallutik uppernarsarpaat, tamannalu pillugu maanna paasiniaaleruttorput.
- Meeqqanut, Inuusuttunut Ilaqutariinnut, Peqqissutsimullu naalakkersuisup Mimi Karlsenip (IA) Ivaaqqami pisoq aallaavigalugu nunatsinni tamarmi ulloq unnuarlu angerlarsimaffinni misissuisoqarnissaanik aallartitsilluni KNR-imut septembarip tallimaanni oqaatigaa.
- Tilioq Inuillu pisinnaatitaaffii pillugit suliniaqatigiiffik pisoq pillugu isornartorsiuingaatsiarput, Inuit pisinnaatitaaffii pillugit suliniaqatigiiffiup tamanna inuit pisinnaatitaaffiinik unioqqutitsioqarfiusoq ilaatigut oqaatigaa.
