Annertuumik innarluutilimmut anaanaasoq: Paniga Ivaaqqamut pulaaqqusaajunnaartarpara

Maibritt Lothsen niviarsiamut 23-nik ukiulimmut annertuumik innarluutilimmut, oqalussinnaanngitsumut parnguinnarsinaasumut nanginillu atuisuussumut anaanaavoq. Paniali tallimanngormat ernivoq. Pisoq politiinit manna misissorneqarpoq.

Maibritt Lothsen panimmi isumaqarluartumik inuuneqarnissaa aammalu inuttut ineriartorluarnissaa angorusullugu ukiut 14-it matuma siorna aalajangertariaqarsimavoq panini nunagisartik qimallugu ulloq unnuarlu innarluutillit angerlarsimaffiannut Ivaaqqamut Qaqortumiittumut nuussasoq.

AAMMA ATUARUK Annertuumik innarluutilik tallimanngormat erneriasaarpoq – ulloq unnuarlu angerlarsimaffik politiinut nalunaarutigineqarpoq

Maibrittillu paninni qimassinnaannginnamiuk nammineq Qaqortumut nooqataasimavoq.

- Kissaatiginerpaagaluarpara nammineerlunga paninnguara paaqqutaralugulu perorsarsinnaassallugu, kisianni annertuumik innarluuteqarmat nukissakkalu killeqarmata ikiorneqarnissamik pisariaqartitsinerput tunngavigalugu ilaquttagut qanigisagullu qimallugit panigalu Qaqortumut nuuppugut.

- Tassami taamani tusaamalluarakku ilinniarluarsimasunik pikkorissunillu annertuumik innarluutillit angerlarsimaffimmi tassani sulisoqartoq, Maibritt Lothsen oqaluttuarpoq.

Tusaajumaneqanngitsutut misigisimavoq

Maibrittip pingaartittuaannarsimavaa panini isumannaatsumik toqqissisimasumillu peroriartorlunilu inuuneqassasoq, taamaammat ulloq unnuarlu angerlarsimaffimmi pissutsinik ippigisaqaraangami nipangersimaannarneq ajorpoq, tamannalu akisunnarsimallugu misigisimavoq.

Tassami piffissaq sivitsorianngitsoq ulloq unnuarlu angerlarsimaffimmi aqutsisunit sulisunillu nuannarineerussimalluni misigisimavoq.

AAMMA ATUARUK Mimi Karlsen om multihandicappet der fødte: Alle dem, der har været nærheden af hende, skal undersøges

- Anaanaasutut ilungersortuarpunga paninnguara toqqissisimasumik inuuneqartikkumallugu, taamaammallu ippigisaqaraangama ulloq unnuarlu angerlarsimaffimmi akisussaasunut apuussisarpunga. Erngertumilli maluginikuuara Ivaaqqami oqartussaasunit sulisunillu ajattugaalerlunga allaat piffissap ilaani panigaluunniit alakkarsinnaatitaaneq ajorpara, Maibritt Lothsen KNR-imut oqaluttuarpoq.

Nuna tamakkerlugu misissuisoqassaaq

Meeqqanut, Inuusuttunut Ilaqutariinnullu Naalakkersuisoq, Mimi Karlsen (IA) Ivaaqqami pisimasoq aallaavigalugu nuna tamakkerlugu ulloq unnuarlu angerlarsimaffiit tamarmik misissuiffigineqarnissaannik suliaqartitsilluni aallartippoq.

- Qulaajarneqartariaqarpoq inatsisit maleruagassallu tamarmik malinneqartarnersut sulisullu tamarmik meeqqanik innarliisimannginnermik uppernarsaammik tunniussisarnersut, aammalu minnerunngitsumik annertuumik innarluutillit nangeqartullu nangiinik taarsiinermi minnerpaamik inuit marluk najuuttarnissaannik malittarisassaq malinneqartarnersoq, Mimi Karlsen KNR-imut siusinnerusukkut naqissusiivoq.

Taamatuttaaq innarluutillit oqaaseqartartuat Anja Hynne Nielsen sakkortuumik isornartorsiuivoq:

- Matumani pineqartoq niviarsiannguamut qanigisaanullu mamianarluinnartuuvoq. Pisullu uppernarsarpaa annertuumik sumiginnaasoqarsimasoq aammalu annertuumik kukkuluttortoqarsimasoq arnap innarluutillip sullinneqarnissaanut isumannaallisaassussaagaluartuni.

Qaqortumi politiit uppernarsareerpaat Ivaaqqami kinguaassiutitigut atornerluisoqarsimaneranik nalunaaruteqartoqarsimasoq. Nunalli immikkoortuani politiit pisortaat Søren Hansen sukumiinerusumik oqaaseqarumanngikkallarpoq, pinerluttoqarsimaneranik misissuisoqarmat.