Inatsisartunut qinikkat assammik arsartartunut aningaasaliisoqarneroqqugaat

Timersoqatigiit assammik arsartartut kattuffiata nunanut allanut unammisartunut pilersaarutit tamarmik aningaasassaaleqineq pissutigalugu taamaatillugit sapaatip akunnerata siuliani oqaatigaa. Taanaannanngilarlu. Nunanut allanut unammisartunut akissarsititsiunnaarlutik aamma oqaatigaat.

Apriilimi tamanna aarlerisaarutigaat. Taamani sungiusaasoqatigiit, Anders Friis aamma Kim Ostermann Petersen Stavangerimi unamminermi sungiusaasut soraarsippaat.

Taamaammat politikerit maanna ilanngupput, nunatsinnilu siunissami pikkorissunik assammik arsartartoqarnissaa pillugu iliuuseqaqqusipput.

Inatsisartunut ilaasortaq Naleqqameersoq, Hans Enoksen taakku ilagaat:

- Naalakkersuisut, soorlu Aningaasaqarnermut Akileraartarnermullu Naalakkersuisup Erik Jensenip, Nunanut allanukaqqaarlutik assammik arsaattartut ataatsimiittarnerit sipaarniarfiginiarlik, Hans Enoksenip Stavangerimi nunarsuarmi pissartanngorniuttoqarnerani ingerlatsineq paatsuunganartoq pillugu innersuussuteqarluni tusagassiuutinut nalunaarunni aallartippaa.

TAAK-ip aningaasaqarnerlunnera pillugu sooq Stavangerimukaqqaarluni ataatsimiissutigineqartariaqarnersoq, Erik Jensenip nammineerluni iluamik nassuiaateqarfigisinnaanngilaa.

Taanna kisimi angalanngilaq. Kultureqarnermut timersornermullu naalakkersuisoq, Aqqaluaq B. Egede (IA) aamma siulittaasoq, Múte B. Egede aamma Stavangerimukarlutik arsartunik isiginnaariarput, naalakkersuisunut qinikkat assammik arsartunik malinnaajartornerminni katillugit 210.000 koruunit sinnerlugit atorpaat.

Hans Enoksenip oqarnera naapertorlugu – aningaasat taakku – iluamik tunniunneqanngillat:

 - Nunanummi allanut ataatsimeeqatigisarneri naammassimanngillat, sunaaffami aningaasartaqanngivissoq angusaqartoqanngivissumik ataatsimeeqatigineqartarsimasut. Naleraq sinnerlugu Naalakkersuisut nunatta arsaattartuinut aningaasaliinissamut kaammattorpagut. Suleqataarusuppugut taperseerusuppugullu.

Aningaasaliinnginnissamut akissaqanngilagut

Naalakkersuisoqatigiit partiit marluk aappaata tassa Siumup timersorneq aningaasaliiffigineqarnerussasoraa. Taakku oqarnerat naapertorlugu aningaasaliinnginnissamut akissaqartoqanngilaq.

Siumup Inatsisartuni gruppiat tamarmi sinnerlugu Karl Tobiassen tusagassiuutinut nalunaarummi allappoq:

- Suut tamaasa suliaqarfigissallugit akissaqanngilagut. Kisianni isumaginngitsoornissaanut aamma akissaqanngilagut. Taamaattumik tamatsinnut isumassarsiatsialaassaaq timersuutit immikkut ukkatarisinnaasagut toqqarsinnaagutsigit, nunarsuarmioqatitsinnut unammisarnissatsinnut aqqutissiuussisinnaasut aamma uagut kulturikkut kinaassuseqarnitsinnut pingaaruteqartut, taanna oqarpoq, nangillunilu:

- Timersuutit tapersersorneqarluartut nunanilu tamalaani anguneqarsinnaasut assersuutigalugu tassaapput assammik arsarneq, arsarneq/futsali, taekwondo aamma sisorarneq.

Aalajangersimanerusumillu oqaaseqarnani Siumup tapersiisoqarnerunissaa oqaatigaa:

- Taamaattumik Siumut isumaqarpoq, timersorneq aningaasaliiffigineruneqartariaqartoq, tamanna aqqutigalugu timersuutit ingerlanneqartut aalajaatsumik siammasissumillu ingerlanneqaqqullugit. Tamanna inuusuttorpassuarnut peqatigiinnerunissamut aqqutissiueqataassaaq, Karl Tobiassen naggasiivoq. 

Angut aningaasaateqartoq, Aqqaluaq B. Egede (IA) suli oqaaseqanngilaq. Taassumali naalakkersuisoqarfia taanna sinnerlugu Sermitsiamit ilanngutassiaq tunngavigalugu suliamut erseqqissaateqarpoq.

Naalakkersuisup TAAK-imut aningaasaliissutit annertusineqarnersut annikinnerulernersulluunniit oqaatiginngilaa, kattuffimmullu ukiut siuliini aningaasaliissutaasareersut nassuiaateqarfigalugit. Tamanna aningaasaliinissamut maanna matoqqasoqarneranik oqarneratut paasineqassanersoq ilisimanngilarput.