Nunanut allanut unammisartunut sungiusaasoq: Pisoq uggornarpoq
Timersoqatigiit Assammik Arsartartut Kattuffiata TAAK-ip nunanut allanut unammisartunut sungiusaasoq Anders Friis sungiusaanermilu ikiortaa Kim Ostermann Petersen erngertumik atuutilersumik taamaatinneqartut marsip 26-anni nalunaarutigaa.
Pisoq tamanna maanna nunanut allanut unammisartunut sungiusaasuusimasup, Anders Friisip uggoraa.
- Aliasuutigaara, minnerunngitsumik arnat tamarmik sinnerlugit, taakkumi suut tamarmik iluatsinnissaannut nukissaminnik atuingaatsiarnikuupput. Taamaalillutik nunarsuarmi pissartanngorniunnissamut anngussinnaaniassagamik, tassanilu uummaterpassuarnik ajugaapput, taanna oqarpoq.
Piffissaq soraarsitsiffiusoq assammik arsartartut sungiusaasuata ukiuni arfineq-pingasuni unammisartunut attuumassuteqarsimasup, eqqarsarnartoqartippaa.
Taassumami arnat nunanut allanut unammisartuisa atajuarsimanerat angusaanni iluatsitsilluarfiunerpaani pingaarnerpaat ilaanniissoraa.
- Piffissalernerata eqqarnarsartoqartippara. Arnat nunanut allanut unammisartut, immaqa ukiorpassuit ingerlaneranni iluatsitsilluarnerpaasut sooq eqqugaassanerat amerlasuunit eqqarsarnartoqartinneqarnera paasisinnaalluarpara, Anders Friis oqarpoq.
Aningaasaqarneq pillugu aalajangerneq
TImersortartunut piginnaasaqartunut tapersiinerup amigaataanera pissutigalugu sungiusaasut marluk soraarsinneqartut Kalaallit assammik arsartartut kattuffiat, TAAK-ip marsip 26-anni tusagassiuutinut nalunaarummi allappaa. Taamaammat atatitsiinnarniarnissaq pissutigalugu aaqqissuunneqarneranik allannguisariaqarsimapput.
- Tamanna angorusunnanngeqaaq, aningaasaqarnerli innarlernagu ineriartortitsinissaq qulakkeerniarlugu pisariaqavissimavoq, assammik arsartartut kattuffiat tusagassiuutinut nalunaarummi allappoq.
Siulersuisut pisoq pillugu nalilersuisimapput, naallu sungiusaasut qulaani pineqartut sulinerminni angusarissaarsimagaluartut taamatut alloriartoqarnissaa aalajangerneqarpoq.
- Aningaasaqarnikkut ilungersunartoqarnera kattuffiup arlaleriarluni nalaassimasaa ilisimasimavara, uanilu soorunami pingaarnersiuisoqassaaq. Taamaammat kattuffimmut imaluunniit Carsten Olsenimut atatillugu ajortumik isumaqartoqanngilaq. Taama pisoqartarpoq, Anders Friis soraarsitsineq pillugu oqarpoq.
Assammik arsartartut kattuffiata siulittaasuata, Carsten Olsenip nunanut allanut unammisartut sungiusaasui oqaatsini kusanartunik tunniussaqarfigai.
- Isumaqarpunga Carstenip suliagut, takutitsinigut, angusagullu pitsaasumik nersualaarutigisimagai. Taamaammat nersualaarneqarsimallunga misigisimavunga. Angusallu aamma nammineq takutitsisoraakka, Anders Friis oqarpoq.
Anders Friisillu piffissaq sungiusaasuuffigisimasani nuannaarluni kingumut qiviarsinnaavaa.
- Tulluusimaaruteqarlunga nivissallu aqqusaarsimasatsinni angusanik tamanik nuannaaruteqarlunga qimappakka. Qanorluunnit pisoqaraluarpat VM-imut peqataajartorsimanermik nuannersumik eqqaamasassaqarpugut, tamanna kimilluunniit tiguneqarsinnaanngilaq, Anders Friis oqarpoq.
