Nunanut allanut unammisartut sungiusaasuisa soraarnerat unammisartut tupigusuutigigaat

Arnat assammik arsarnermi nunanut allanut unammisartut Andreas Friis aamma Kim Ostermann Petersen sungiusaasoralugit Stavangerimi qaammatialuit matuma siorna nunarsuarmi pissartanngorniuteqataapput. Timersoqatigiit Assammik Arsartartut Kattuffiata sungiusaasut taakku marluk maanna soraarsippai.

Sungiusaasut poorskinngitsiartoq erngertumik atuutilersumik tunuarput. Soraarsitsinerlu nunanut allanut unammisartut qaammatit sisamat matuma siorna pissartanngorniuteqataasut tupigusuutigaat.

- Landsholdeqarnersorluunniit aamma naluarput, sungiusaasoqanngippat landsholdeqarpa? Andrea Heilmann arnat assammik arsartartut anføriat oqarpoq.

Taassuma unammisartut kattuffiup aalajangiineranik ilisimasaqaavissimanngitsut erseqqissaatigaa, soraarsitsinerlu kattuffiup kattuffiup aningaasaqarneranut sunniuteqarani piginnaasanik pitsanngorsaaniarnermik anguniagaqarneranik uniuilluinnarsoraa.

- Inuusuttuararpassuarnik suli arsartoqarpugut, ukiorpassuit aamma ilaasareernikunik. Tassa taakkuupput aamma ingerlariaqqinnissaanut suli sulissutigineqartut sungiusaasuniit. Taamaattumik taamatut soraarsitaanerat tulluanngitsorujussuuvoq, taanna oqarpoq.

Siunissaq nalunartoq

Soraarsitsisoqarneralu arnat nunanut allanut unammisartut TAAK-imit aalajangernermik ilisimasaqanngitsut ernumassutigaat. Taakku tamanna tusagassiuutitigut paasivaat.

- Aalassannarpoq taamatut paasillugu sungiusaasuujunnaartitaasut, taamatut paasitinneqaratta tupannarpoq, Andrea Heilmann oqarpoq.

- Nalornivugut taama oqaannaraanni, kattuffimminngaanniilluunniit paasitinneqarnikuunngilagut, paasitinneqanngilagut imak pisoqarpoq. Taava ilaa pilersaarummik takusaqarnikuunngilagut, susoqalerpa maannakkut apeqqummiippugut, Aviaaja Heilmann ilaliivoq.

UYnammisartut sungiusaasullu ukioq kajumilluinnarlutik assammik arsarnermi unammipput. Assammik arsarnerup nuannersortaa maanna arnat assammik arsarnermi nunanut allanut unammisartut siunissamut ernumanerannik taarserneqarpoq.

- Assut VM-erluni nuanneq. VM-eqqikkusunnaraluaq, Andrea Heilmann oqarpoq.

Sungiusaasulli soraarsinneqarnerata nalunaaruteqarnerata kingunerisaanik susoqarnissaanik maanna qularutiginnilerpoq.