Erik Jensenip VM-ertoqarneranut atatillugu angalanera naammaginnginneqarlunilu ersarinngitsoq

Ulloq ataaseq. Unammineq ataaseq. Kiisalu Timersoqatigiit Assammik Arsartartut Kattuffiata (TAAK-ip) siulittaasuata ataatsimeeqatiginera.

Erik Jensenip (Siumut) Naalakkersuisuni ilaasortat allat arlaqartut peqatigalugit VM-imi arnat nunarsuarmi pissartanngorniunnerannut siorna novembarimut angalanini taama isigaa.

Pineqartup nammineq oqarnera naapertorlugu pisortatigoortumik suliassaqarneq pineqarpoq. Taanna Stavangerimut angalannginnermini Københavnimi danskit aningaasaqarnermut ministeriat aamma nationalbankip pisortaa ilaatigut ataatsimeeqatigai.

- Tassungalu atatillugu aamma periarfissinneqarpunga Nunatsinni siuttooqataasutut aamma Naalakkersuisut siulittaasuata tulliatut aamma angalasinnaanissannut periarfissakka atorlugit Stavangerimut VM-ertunik ataatsimeeqatiginnillungalu malinnaallunga, Erik Jensen oqarpoq.

Ataatsimiinneq pilersaarutaanngitsoq

TAAK-illu siulittaasuata ataatsimeeqatiginera ataatsimiinnerit pingaarnerit ilagaat.

- Soorunami angalanera assigiinngitsunik aamma malitseqarpoq. Kisianni tunngaviusumik tassa naapitsinerput aningaasaqarneranut tunngasut allarpassuillu aningaasalersuutinut tunngasut aamma ilaatigut eqqartukkatta ilagivaat, qitiusorujussuuppullu taakkua aamma kattuffiup pisariaqartippaa taakkunatigut aaqqiiffissanik eqqartueqatigiinnissaq, Erik Jensen oqarpoq.

TAAK-ip siulittaasuata, Carsten Olsenip Erik Jensenip Stavangerimi ataatsimeeqatigisimanera eqqortuusoq KNR-imut uppernarsarpaa.

Erik Jensenilli TAAK-ip ataatsimeeqatiginissaa Stavangerimut angalanermini pissutaaneraraa TAAK-ip siulittaasuata ataatsimiinnissaq sioqqullugu pilersaarutaasimannginnerarpaa:

- Erik takkuttussaariarmat aningaasaqarnitsinnilu pisoqariarmat taava ataatsimiilaarnissaq ajunngilaq, Carsten Olsen oqarpoq.

Aningaasaqarnermut Akileraartarnermullu Naalakkersuisup ataatsimeeqatiginissaa qanoq sivisutigisumik pilersaarutigereersimavisiuk?

- Ataatsimiinnissamut pilersaaruteqanngilaq. Nunatsinnut illersuinissamut, assammik arsartartunut, timersortartunut illersuinissamut tunnganerusoraara, Carsten Olsen oqarpoq.

Sooruna Stavangerimi?

Erik Jensenip – assammik arsartunik malinnaajartorluni TAAK-imillu ataatsimeeqatiginnikkiartorluni Stavangerimiinnera ilisimavarput. Kisianni Erik Jensen Stavangerimiinnera iluatsillugu ataatsimiinnermut peqataanersoq imaluunniit ataatsimiittussaariarami Stavangerimiinnersoq ilisimasaqarfiginerulinngilarput.

Sorleq siulliunersoq nalunarpoq. Ataatsimiinnissaq pisariaqarsimanersoq Demokraatinit Inatsisartunut ilaasortap, Anna Wangenheimip aamma eqqarsarnartoqartippaa:

- Tassa nammineq kiffaanngissuseqarluni nammineq angalarusukkuni takanna, kisianni eqqarsarnartoqartippara TAAK ukioq naallugu Nuummi naapissinnaallugu periarfissaqartilluni taava sooq VM-ernerup nalaani Norgemi naapissimassagaa, taanna oqarpoq, nangillunilu:

- Aperigussinnga uanga isumaqarpunga isumamineerpasittoq, taanna oqarpoq.

Taamaammat Erik Jensenip angalaneranut tunngatillugu arlalinnik apeqquteqarpoq. Apeqqutit ilaat imaappoq: "TAAK-imi siulittaasoq naapinniaraanni Stavangerimiunngitsoq kisiannili Nuummi naapiinnarsinnaaneranut tulluarnersoq, Demokraatit isumaat Naalakkersuisuniit ilalerneqarnerluni?"

Erik Jensen tassunga atatillugu ima akissuteqarpoq:

"Aningaasaqarnermut Akileraartarnermullu Naalakkersuisup, ilaatigut Naalakkersuisunut Siulittaasup tulliatut, ilaatigullu Aningaasaqarnermut Akileraartarnermullu Naalakkersuisutut, unammineq ataaseq isiginnaarpaa.

TAAK-ip siulittaasua Aningaasaqarnermullu Akileraartarnermullu Naalakkersuisoq ataatsikkut Stavangerimiittussaapput, taamaammallu matumani ataatsimeeqatigiinneq napertuuppoq."

Taarsiisoqarnissaa kaammattuutigigaa

Erik Jensenip peqataanerata saniatigut Naalakkersuisunut ilaasortat allat aamma peqataapput. Matumani Múte B. Egede, Aqqaluaq B. Egede aamma Mimi Karlsen. Anna Wangenheimilu aperigaanni taakku amerlavallaangajapput:

- Timersornermut naalakkersup, Inatsisartunut siulittaasuusup (Mimi Karlsen, aaqq.) pisortatigoortumik avammut kiinneraarnera naammattariaqartoq isumaqarpunga, Anna Wangenheim oqarpoq, nangillunilu:

- Inatsisartut siulittaasumik timersornerup tungaatigut kiinnertartussaammat taanna naammaginarsorigaluarpoq. Aamma ajoriffissaqartinngilara aamma naalakkersuisoq nammineerluni kissaatigisaminik aallaaveqarsimaguni isumaqarpunga nammineq akilertariaqaraa angalanini.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup naatsorsuinera naapertorlugu Københavnimit Stavangerimut utimullu angalaneq 8.279 koruuneqarpoq.

Aningaasat utertinneqarnissaat piumasaqaatiginiarpiuk?

- Naalakkersuisunut kaammattuuteqarusuppunga aningaasat taakku atorsimasai utertinneqartariaqartut, nammineq akilertariaqaraat, isumaqaratta Naalakkersuinikkut peqataasimasut taamatullu nassuiaasiorsinnaasimasut Stavangerimi susoqarsimaneranik, sulerisimaneranillu taakkua illersorneqarsinnaanerupput, taamaattumik kaammattuutigerusupparput uku aningaasat utertinneqartariaqartut, Anna Wangenheim oqarpoq.

Nunarput akiliisoq

Erik Jensenip Stavangerimut angalanini pisortatigoortumik suliassaqarnermik pissuteqartoq – namminerlu angalanerunngitsoq attatiinnarpaa. Taassuma isikkamik arsarneq, assammik arsarneq timersuutillu allat nuannaralugillu malinnaaffisarpai, kisianni – pingaartumik naalakkersuisut siulittaasuata tulliatut tapersersuinermik takutitsinissaq pingaarnerpaavoq:

- Isumaqarpunga nunatsinni siuttutut assigiinngitsut unammersuarnerit qaqutigorujussuaq pisartulluunniit pigaangata aamma tapersersuinissarput, malinnaalluartarnissarpullu pingaaruteqartorujussuusoq.

Erik jensenip akileraartartut akiligaannik akiilluni nammineq angasimaneragaalluni Anna Wangenheimip isornartorsiuinera isumaqatiginngilaa. Taamaammallu tamanna aamma pissutigalugu aningaasanik utertitsinissaq itigartitsissutigaa:

- Isumaqanngilanga privatimik angalallunga. Taamaattumik nammineq inuiaqatigiit aningaasaataannik atuilluarsimanngitsutut iperteriniarneq isumaqatiginngilara. Tassunga sangutitsiniarneq uggorissaqaara, timersortartut ataatsimoortut tapersersorneqarnissaat inuiaqatigiinnullu taama aaqqissuussami annertutigisumi tapersersorneqarnissaat politikkimi iperterissutiginiarlugu ingerlatsisoqalersimassappat taanna ajuusaarnartorujorujussuussaaq.