Nunanut allanut unammisartut VM-imi unamminerminni kingullermi ajorsartut

Kalaallit arsat nunanut allanut unammisartuisa VM-imi Iranimiunut 31-nngorniuullutik pingasunngornermi ullaap tungaani unammimmata ajugaasimallutik angerlarnissamut periarfissaanni kingulliuvoq.

Naalli isertitsinerit kusarluinnartut arlaliugaluartut unamminermi kingullermi 23-28-mik ajorsarput.

Iranimiut arsartuat isertitseqqaartuuvoq, tamatuma kingorna kalaallit arnat ingerlatsilluarput. Ivalu Bjerge nunatsinneersut isertitaat siulliit marluk isertippai, ulluatungaanilu målmandip Rina Møller Lorentzenip Iranimiut straffekastimi isertitseriarneranit marluk annaappai.

Taamaalilluni unammineq 12 minuttimik ingerlareersoq nunarput 5-1-imik siuaqqavoq.

Unamminerup aallartilluarnerata kingorna Iranimiut anngukkiartulerput, unammineq taamaalilluni naligiiffiunerulerluni. Unamminerup immikkoortua siullermit unikkallarnermi 12-12-erlutik naligiipput.

Unamminerup aappaa aallartimmat unammineq kalaallinut unammillernarnerulaalerpoq, Iran arlaleriarluni aamma siuarpoq. Unammilluartulli Ivalu Bjergep nunarput siartarlunilu kinguartartoq tulleriinnik pingasunik isertitsitippaa.

Unamminerup aappaa unammingaatsiarfiuvoq, holdillu tamarmik arlalinnik anisitaasoqarput, tamannalu nunatsinneersunut ajornartorsiortitsinerpaavoq, unamminerummi aapaata ingerlanerani Iran isertitsinernik marlunnik siuarmat.

Iranimiut målmandiat Fatameg Khalili Behfar kalaallinut unammisartunut nuannerpallaanngitsumik annaasseqattaarpoq. Tamatuma saniatigut iranimiut unammisartui arriitsumik siariartorlutik tallimanik siuarput.

Unamminerup kingorna kalaallinit unammisartunit isertitseqattaarnerpaaq unammilluarnerpaatut toqqaggaavoq.

Kalaallit Nunaata ajorsarneratigut kalaallit 32-nngorput.