Assammik arsarnermi VM: Maanna eqqissiimisoqarpoq, taavami maannakkut?
Kalaallit arnat assammik arsartartut nunarsuarmi pissartanngorniuteqataareerlutik Frederikshavnimit tikeqqinnerannit sapaatip akunnera qaangiuppoq.
Taakku inuunermini misigisassaminnik tulluusimaarnerminnillu nassataqarlutik tikipput, kisianni arnat peqataanerat nunatta qanoq aamma pissarsiaqarfigaa?
Tamanna pillugu kalaallit assammik arsarnermi kattuffianni siulittaasoq, Carsten Olsen aperaarput.
- Nunarsuarmi pissartanngorniunnermi peqataanerpoq arsaaffimmi arsaaffiullu avataani kusanarluinnarpoq, taanna oqarpoq.
Tamatumali saniatigut nunarsuarmi pissartanngorniuteqataaneq akisungaatsiartoq isertuutinngilaa. Akisungaarmallu kattuffik maanna amigartooruteqalerpoq.
- Akiitsoqarfigilerparput, nunarsuarmimi pissartanngorniuteqataaneq akisoorujussuuvoq. Taamaammat maanna ikimik mamisaassaagut ataatsimullu iginnilerluta, erngertumik toraagaqaqqilissaagut, Carsten Olsen oqarpoq.
Nunarput assammik arsarnermi ukiuni 22-ni peqataanikuunani peqataavoq. Siullermik 2001-imi peqataasoqarpoq, unammisaqattaanermilu tulluusimaartoqaannavilluni. Taamaammat maannakkut tulluusimaaginnarnissaq nutaanillu anguniagaqartuarnissaq siunissamilu angunissai neriuutiginarput.
Ukioq mannali pissartanngorniuteqataaneq malunnartinneqassaaq. Kommuneqarfik Sermersuullu borgmesteria januaarip arfineq-pingajuani ilassinninnissamut qaaqqusivoq.
