VM-mi nasat nuersakkat nunatsinni meeqqanut ikiortariaqartunut aningaasanik pissarsissutaassasut

Kalaallit assammik arsarnermi nunanut allanut unammisartut VM-imi unamminerminni kingullerpaatut inissittut angusarissaarnerpaanngillat.

Taamaakkaluartorli kalaallit arnat assammik arsartartut VM-imi misilittagaqalerlutik, tapersersorneqangaatsiarlutik nuannersunillu eqqaamasassarpassuanillutillu angerlaqqipput.

Nunanut allanut unammisartut tigussaanerusumik eqqaassutissaminnik aamma angerlaassaqarput.

Taakkumi unammersuarnerit naggataanni unammiffiusumit, Frederikshavn Kommunimit nasanik tungujortunik qalipaatilinnik qalipaatigissaartumillu nivingataqartunik tunineqarput. Nasat arnanit hunnorujulikkaanit assammik arsarnermi kingullerni unamminerit aallartinnginneranni nuersagaapput.

VM-ip kingorna nasat nuersakkat tuniniarneqarput. Tassanngalu isertinneqarput maanna avinneqarlutik Kalaallit Nunaannut Ukrainemullu tunniunneqarput.

Nunarsuarmi pissartanngorniuttoqarnissaanut nasat tuniniarneqarput. Aningaasallu tassani isertinneqartut maanna avinneqarput.

Aningaasat katillugit 17.500 koruuniusut Kalaallit Nunaanni meeqqanut inuusuttunullu ikiortariaqartunut atorneqassapput.

Frederikshavnimi tusagassiorfik, Kanal Frederikshavn taama allaaserisaqarpoq.

Kalaallit nasaat Maniitsumi nuersarneqartut

VM-imi nasat Frederikshavnimit immikkut atsiorneqartut nunanut allanut unammisartunut tamanut, Arena Nordimi unammeqataasunut kiisalu Dansk Håndboldimi nammineq kajumissutsiminnik suliaqartunut tunniunneqarput.

Unammisaqattaarnerit pinnginneranni nuersaanermik annertuumik aaqqissuussisoqarpoq – taannalu taaneqarluni ”Verdens Største Strikkecafé” – aaqqissuussinermi tassani arnat 365-it peqataallutik nasanik nuersaaqatigiipput.

Naalli nasat amerlanerpaartaat Danmarkimi nuersarneqaraluartut kalaallit nunanut allanut unammisartuisa nasassaat Maniitsumi nuersarneqarput.

Arnaq Frederikshavnimeersoq nuersaanermik nuannarisaqartoq Maniitsumi sulisoq Maniitsumi arnanik aqqaneq-marlunnik ataatsimoorlutik nasanik nivingasussaanillu nuersaatitsivoq, kalaallit unammisartut nasassaat taamaalillutik nunatsinni nuersarneqarlutik.