VM: VM: Angajoqqaat tulluusimaangaatsiartut aqqutaa tamaat malinnaasut

Kalaallit assammik arsartartut VM-imi matumani unamminerat naammassivoq. Assammik arsartartut katillugit arfineq-marloriarlutik unammipput, taamaammat Dorthe aamma Claus Jodening aamma Lars Kilime isiginnaarutip saanit piinngillat.

Taakkumi paniat panissaallu Sascha Zeeb kalaallit arsartuisa saamiatungaaniittoraat, taassumalu ataatassaata isaani tulluusimaarneq takuneqarsinnaallunilu panissami unammineranik nassuiaagaangat nipaatigut tusaaneqarsinnaavoq.

- Nuanneq. Sascha tulluusimaarutigilluinnarparput, pikkorillunilu ilungersuussilluarpoq, aamma naak ajoquteqallattaaraluarluni takkuteqqittuaannarpoq, taanna oqarpoq.

- Imaannarluni kaa tupinnaq ilaa inupparparsuit akornanni taakkunnguit panipput holdeqataalu tamarmik VM-imut ilaasinnaasut ilaa VM! Tupinnaq tanngassimaarnaq tanngannaq anaanaalluni aamma takorloorsinnaavara holdeqaterpassuisa angajoqqaavi aamma taamatut uattuffaarik misigisimassasut, Dorthe Jordening oqarpoq, nangillunilu:

- Holdip tamarmi pissarsiaqartingaatsiarpaatigut.

Dorthe aamma Claus Jordening assammik arsartut unamminerannit siullermiilli Nuummi atuagaarniarfimminnit malinnaalerput. Kingullerni unamminerat initungaarmat suligaluarlutik naallu ilaatigut pisiniaqartoqartaraluartoq pisiniarfimmi inniminniinermut qarasaasiatik pisiniarfiup iluanukaallugit assammik arsartunik isiginnaarsinnaapput.

- Unamminerup ingerlanerani isertitsinerit nikittaalluta takusarpagut. Uanga unamminermi isertitsineq takuara, isertitsinerulli aappaani pisiniartitsigama anillappunga. Taannali Dorthep takuaa, taamaammat nikittaappugut, unamminerannimi sulivugut, Claus Jordening oqarpoq.

Pissangaffiusoq

Iranimut ullumi unammineq allaanerulaarpoq. Taakku pingasuullutik pisiniarfimmi isiginnaaruteeqqakkut pissanngallutik isiginnaarput. Unammineq tamaat pissangariilipput, tamannalu pisiniarfimmi malugineqarsinnaalluarpoq.

'Aap, naamik, buh' assaallu eqissimasut pisiniarfiup ineerartaani minutsit 60-t initupput. Angajoqqaallu pingaartumik unamminerup immikkoortuani siullermi pissanngapput. Pissutissaqarluarpormi, unammisummi unamminerup unikkallarnerani naligeeqqissaarput. Taamaammat minutsit kingulliit 30-t aalajagiisussaapput.

Unamminerlu Iranip 28-23-mik ajugaaneranik inerneqarpoq, unamminerullu naammassinissaata tungaanut tapersersuisut tulluusimaarutiginnittullu takuneqarsinnaalluarpoq.

- Taama soqutigineqartigilernissarput nunarsuarmilu taama naleqartinneqartiginissarput takorloorsimanngisaannaraluarpara, Sascha Zeebip ataatassaa oqarpoq.

- Holdit inuuniutigalugu assammik arsartartuunngitsut aamma unammeqatigiinnermik sungiusimanninngitsut takusinnaavagut, taamaakkaluartorli Kalaallit Nunaat nunarsuarmi unamminermi peqataatippaat. Maligassiuisuupput – inuusuttunuinnaanngitsoq – aammali qanoq takutitsisinnaanitsinnik nunarsuarmut tamarmut takutitsipput, Claus Jordening oqarpoq.

Kalaallit Iranimut ajorsarnerat kalaallit arnat VM-imi 32-nngornerannik isumaqarpoq. Claus aamma Dorthe Jordeningip, kiisalu Lars Kilimep Sascha Zeep holdillu sinnerisa Nuummut tallimanngorpat tikinnissaat qilanaariinnalerpaat.

- Naak ajugaanngikkaluartut pilluarpunga, taamaammat tamarmik angerlaqqinnissaat maanna qilanaaraakka, Dorthe Jordening naggasiutigalugu oqarpoq.