Assit takukkit: Nunanut allanut unammisartut angerlamut tikittut
Nunanut allanut unammisartut arlallit Nuummut ullumi tikeqqipput.
VM qaangiuppoq, taannalu unamminerpassuarnik misigisassanillu annertuunik nassataqarpoq.
Nunatsinni arnat assammik arsarnermi nunanut allanut unammisartui ukiuni 21-ni peqataanngereerlutik nunarsuarmi pissartanngorniunnermi peqataaqqipput.
Nunanummi allanut unammisartut juunimimi anngunniunnermi Canadamut 17-15-imik ajugaanerisa kinguneratisaanik 2023-mi nunarsuarmi pissartanngorniuteqataasussanngorput.
Pissartanngorniunneq novembarip 29-ani aallartippoq, nunattalu aallaqqaasiutigalugu Norge unammivaa.
Taakku nunarsuarmi pissartaapput, unammisaqattaarnermilu ajugaasussatut ilimagineqarluarlutik – tamatumalu saniatigut nunaminni Norgemi Stavangerimi unammisoqarluni.
Tamannali nunanut allanut unammisartutta ersissutiginngilaat.
Taakkumi aallartilluarput, nunarsuarmilu pissartaanerminnik illersuisut siuarniarnerat ajornakusooqqaarluni. Unamminerup aallartinneranit minutsit 15-it qaangiuttut naligiingajapput, Norgemi målinik marluinnarnik tassa 8-6-eqqallutik siuaqqavoq.
Norgeli siuariartorlualerpoq, unamminermilu 41-11-mik ajugaalluni.
Unamminerup aappaani nunatsinni innuttaasut amerlassusaannit 900-riaammik amerlanerusumit innuttaasoqartumeersut tassa Korea Kujallermeersut unammineqarput.
Unamminermilu nikinngissutaasoq taama annertutiginngilaq, nunanummi allanut unammisartugut isertitsinernik aqqanilinnik kinguarsimaannarlutik ajorsarput.
Eqimattani unammisaat kingulleq tassaapput Østrigimeersut angillutillu nukittuujusut.
Naallu nunanut allanut unammisartugut østrigimiut illersuisuinit unitsinneqartaraluarlutik nunatsinneersut unamminerni tassani pissartanngorniunnermi isertitsiffiginerpaasaminni 23-raarput.
Unamminermili tassani 43-23-mik ajorsarput, taamaalillutillu eqimattami unammiffigisaminni pingasoriarlutik ajorsarlutik.
Unammisartulli kajumissuseqartuarlutik sunillu tamanik mikigaluartunilluunniit nuannaaruteqarlutik amerlasuut uummataasigut immersorpaat.
Nunanulli allanut unammisartut kisimik Stavangerimi maluginiarneqanngillat. Illersuisummi 100-nit amerlanerusut arsarfiusumut isiginnaariartorput taakkulu takutitsilluangaarmata aaqqissuisut kalaallit illersuisui unamminermi illersuisui arlaleriarlutik pitsaanerpaanerarpaat.
Presidents Cupimut ingerlaqqinneq
Nunarsuarmi pissartanngorniunnermi eqimattani unamminermi pingasoriarlutik ajorsarnerat unamminerit naammassinerannik isumaqanngilaq. Pissartanngorniunnermimi peqataasut tamarmik qassinngornissaat inissinneqartussaavoq, taamaammat holdit eqimattani kingullertut inissittut Frederikshavnimut ingerlaqqipput, tassanilu 25-mit 32-nngorniunnermi peqataallutik.
Tassanilu Island, Kina, Paraguay Iranilu unammivaat.
Islandimut unamminermi ajorsangaatsiarput, Kinamullu unamminermi immikkoortumi siullermi aallartinnerlioriarlutik unikkallarnerup kingorna Kinamiit isertitaqarnerupput.
Unamminerli Kinamut 32-24-mik ajorsarnermik inerneqarpoq.
Unamminerup tulliani Paraguay unammivaat, unammineq taanna pissannganarluinnarpoq. Unammineq tamaat naligiittoqangaatsiarpoq, unamminernilu kingullerni aatsaat nikingasoqalerluni. Isertitsinernillu marluinnarnik nikinngassuteqarlutik ajorsarput.
Taamaammat nunanut allanut unammisartut unammisaqattaarnermi 31-nngorniuunnermi Iranimut unammipput. Iranillu 28-23-mik ajugaaneranik unammineq naammassineqarpoq.
