Nunatsinneersut nunarsuarmi pissartaanerminnik illersuisunut sapiissuseqarlutik unammisut

Naak norskit ajugaanissaat amerlasuunit naatsorsuutigineqareersimassagaluartoq nunatsinneersut unamminerup aallartinneranit minutsit 15-it qaangiuttut isertitsinernik marluinnarnik kinguarsimanissaat naatsorsuutigisimagunanngilaat.

Nunarsuarmi pissartanngornikut nunarsuarmilu pissartanngorniunnermi matumani ajugaasussatut naatsorsuutigineqartut unamminerminnik aallartitsilluarmata unammineq 43-11-mik naammassineqarpoq.

Nikinganerat sivisuumik annertunngitsoq

Unammineq inuiattut erinarsuummik – Nunarput utoqqarsuanngoravit-mik – aallartinneqarpoq, tamatumalu kingorna kalaallit illersuisui timersortarfik tamaat qanngulutsillugu ”Kalaallit Nunaat”-mik suaarput.

Norgemiunit Henny Reistad unamminermi siulliulluni isertitsivoq, nuannaarnerli sivikitsuinnaavoq.

Saassussinermimi siullermi Andrea Heilmann naligiissitsilerluni isertitsivoq. Isertitsineq illersuiartorlutik angalasut oqaaseqartartullu nuannaatsallutik suaartarnerannik kinguneqarpoq.

Nunarput sinnerlugu nunarsuarmi pissartanngorniunnermi kingullermik Kamilla Jensen 2001-mi Østrigimut unamminermi isertitsinikuuvoq.

Nunarsuarmi pissartanngorsimasut nikinganerulerniarnerat ajornakusuulerpoq, minutsillu 15-it qaangiuttut Norge 8-6-imik siuaqqaannarluni malittariipput.

Nunatsinneersunit Ivalu Bjerge isertitsinerpaavoq – tassa pingasunik isertitsillunilu isertitsissutaasunik marlunnik tunniussisuuvoq.

Nunarsuarmili pissartaanerminnik illersuisut aallartisarlutillu sukkatsipput. Sakkortuumillu sukkasuumik saassusseqattaarnerisa kingorna Norge 19-7-imik siuarsimalerpoq.

Unamminerup immikkoortuata aappaa naammassinermisulli aallartippoq.

Norge sukataarpoq, nunatsinneersullu sapiissuseqarlutik sapinngisaminnik akiuupput, norskilli siuarsimanerat annertusigaluttuinnarluni unammineq 43-11-mik naammassivoq.

Nunatta unammisassaani marluk ullumi siusinnerusukkut unammipput. Unamminermi Østrig Korea Kujallermut 30-29-mik ajugaavoq.