Kunngissap VM-imi unammisussat unammilluarnissaannik kissaakkai

'Ingerlalluarisi' kalaallit arnat assamik arsartartui, Stavangerimi pissartanngorniuttoqarnerani unammeqqaarnerminni Norgemut unnugu unammisussat, inummit immikkut illuinnartumit inuulluaqqussuteqarfigineqarput.

Tassa Kunngikkormiu ataqqinartoq, Kunngissaq Frederik Instagramikkut allagaqarpoq.

Taassuma arnat nunanut allanut unammisartut pissartanngorniunnissamut unamminerit naggataanni angusaannik aamma nersualaarpai. Taassuma anngunniunneq 'pikkunarnerarpaa', arnallu unammerusussuseqarnerat VM-imi malinnaaffiginissaa qilanaarinerarlugu.

Suliassaq imaannaanngitsoq

Arnat kalaallit unammerusussuseqarnerallu angusarissaarsinnaanersut unnugu siullermeertumik misilittarneqassaaq, tassanilu Norgemeersut Europami nunarsuarmilu pissartanngorsimanerminnik illersuilersut unammisussaavaat.

Suliassarli ajornakusoortussaarpasissoq, ukiut 30-t sinnerlugit timersornermut tunngasunik oqaaseqartartoq, Noah Mølgaard naliliivoq.

 - Ajornakusoortorujussuunissaa naatsorsuutigissavarput. Isertitsiffiginiarnissaat ajornakusuussaaq. Norge nammineq arsarfimmini arsartussaagami naatsorsuutigineqartariaqarpoq tamaviaarsuaarlutik sukkasuumik sakkortuumillu arsarumaartut. Taamaattumik aamma sungiusaasuminninngaanniit ilisimatinneqareerput dommer siullerpaamik siggareerpat taava naggataamik siggarnissaata tungaanut 5. gearimik tamaviaaginnaavillutik arsassasut, taanna oqarpoq.

Taamaammat nunarput periarfissarujussuaqanngitsoq siulittorpaa. Peqataanerpulli angisoorujussuuvoq, tamannalu Kunngissaq Frederiup aamma maluginiarpaa.

Kalaallimmi arnat ukiuni 22-ni aatsaat siullermeerlutik nunarsuarmi pissartanngorniuteqataalerput. Kunngissallu malinnaanissani qilanaaralugu allappaa.

Kunngissatulli unamminerat malinnaaffigerusukkukku KNR1-ikkut unnummut nalunaaqutaq 17.00-imiit toqqaannartumik malinnaasinnaavutit.