Aningaasaataaruttut: Assammik arsarlutik nunanut allanut unammisartut ukiup sinnerani katersuuteqqissanngitsut
Nivissat U18-it Kinamiit Nuummut aggustimi tikinnissaata saniatigut nunanut allanut unammisartunut ukiup sinneranut pilersaarutit tamarmik taamaatinneqarput.
Kalaallit Nunaata assammik arsartartuisa kattuffianni siulersuisuni siulittaasoq Carsten Olsen KNR-mut taama oqaluttuarpoq.
Kattuffimmi aningaasaataaruppoq.
- Aningaasaateqanngilagut, 2023 pisoqarfioqimmat. Siullermik nunarsuarmi pissartanngorniunnermut anngunniuteqataavugut, tamatumalu aaqqissuunniarnera ilungersunarsimaqaaq. Taavalu nunarsuarmi pissartanngorniunnermut peqataalluni aamma akisoorujussuuvoq. Aamma pilersaarutit allat ingerlanniarsarigatsigit kattuffiup nammineq aningaasaataai nungukkiartuinnarnikuupput, siulersuinuni siulittaasoq oqarpoq.
Taamaammat nunanut allanut unammisartut ukiup sinnerani sammisassaqartinnissaannut akissaqanngilaq. Arnat angutillu tamarmik eqqugaapput. Sammisassat taamaatiinnarneqartut pingaaruteqaraluarput.
- Arnat nunanut allanut unammisartut nunarsuarmi aappagu pissartanngorniunnissamut anngunniunnermi peqataasussat katersuunnissaat taamaatippoq. Aamma angutit inuusuttortaat nunarsuarmi pissartanngorniunnissasmut ukiamut anngunniuteqataanissaraluat taamaatinneqarpoq, Carsten Olsen oqarpoq.
Aappaagu suli ajornartorsiutaassaaq
Tassalu ukiup sinnerani katersuunnerit anngunniunnerillu taamaatiinnarneqarput. Nunanulli allanut unammisartut aamma aappaagumut neriuuteqarpallaassagunanngillat.
Kattuffimmi suli aningaasakilliortussaavoq.
- Iluatsitsilluta aningaasaliisussarsissanngikkutta aningaasaqarnerput aatsaat 2025-mi pitsaanerulissaaq. Pingaarnersiuilluta sipaarniuteqartariaqarsimavugut. Assersuutigalugu arnartagut nunarsuarmi pissartanngunniunnermi anngunniuttussaapput, angutiinngitsulli. Taava arnattagut salliuttariaqassavagut, Carsten Olsen oqarpoq.
Tamannalu uggornartoq taanna isumaqarpoq.
- Nunanut allanut unammisartugut nunarsuarmi pissartanngorniunnermut anngunniutilerunik imminnut sungiusimallualeqqaarnissaannut periarfissaqartivinngilagut. Pikkorinnerpaammi ilaanniissagaanni pitsaasunik sinaakkuteqartussaavoq. Taamaammat piareersarluarsimannginnermik kinguneqarsinnaavoq.
Soqutiginnittut ilaasortanngortullu nunarsuarmi pissartanngornerniutereernerup kingorna amerlatsissimasut assammik arsartartut kattuffiata siulersuisuini siulittaasup oqaatigaa. Taamaammat aningaasakilliorneq peqqutaalluni sammisaqartitsisinnaannginnertik anneralugu aamma oqaatigaa.
Politikkikkut iliuuseqaqqusisoq
Assammik arsartartut kattuffiat nalinginnaanerusumik ingerlaqqilissagunik aappagu million koruunit tungaannut sipaarniuteqartariaqarlutik Carsten Olsen naliliivoq.
TAAK ukiumut 850.000 koruuninik taperneqartarpoq. Nunanulli allanut unammisartut pitsaasunik sinaakkuteqartinneqassappata, nunanullu allanut unammiartortassappata, tapiissutit naammanngitsut siulersuisut siulittaasuat isumaqarpoq.
- Naatsorsukannissagutsigit, nunanut allanut unammisartuutigut inuusuttuniit inersimasunut 100-t missaaniipput. Tassalu unammisartumut ataatsumut 8.500 koruunit missaannik aningaasaliisinnaavugut. Taakkulu ikippallaarujussuarput. Politikkikkulli iliuuseqaqqusinerput tusaajumaneqarpallaanngilagut. Tamannalu pakatsinarpoq taanna, oqarpoq.
Nunanut allanut unammisartut politikerinit tapersersorneqarnerusariaqartut, siulersuisuni siulittaasoq isumaqarpoq.
- Timersortartut pikkorinnersaasa tapersersorneqarnerusariaqarnerata politikerinut paasitinnissaanut ilungersornikooqaagut. Siammasissumik timersornermut aningaasaatigut pikkorinnersaanut atortariaqartarpagut. Taamaattussaanngikkaluarpoq.
KNR-ip timersornermut naalakkersuisoq Aqqaluaq B. Egede oqaaseqartinniarlugu attaviginiarsaraa.
