Inatsisartunut qinigaasut nukarlersaat suliumassuseqarluarpoq

Inatsisartunut ippassaq qinersinermi qinigaasut inuusunnersaata, Inuit Ataqatigiit sinnerlugit qinigaasup, 21 ukiullip, Juliane Henningsenip, qinigaanini paasigamiuk tupaallakkaluaqaluaqaluni sulerusussuseqarluarpoq.

- Qinigaanera paasigakku nuannaaqaanga kisianni aamma tupappunga, Juline Henningsen oqarpoq.

Juliane Henningsen inuusuttuaraallunili politikimik soqutiginnissimasoq oqarpoq inatsisartunut qinigassanngortinnissaminut aalajangerami annaasaqarnaviarani misigisimavoq.

- Eqqarsarsimavunga misilikku annaasaqarnaviarnaga ilinniutigissallugu qinigaaguma qinigaanngikkumalunnit taamaattumik nuannerluinnarpoq tatigineqarluni qinigaalluni, Juliane Henningsen oqarpoq.

Juliane Henningsen inatsisartuni sulileruni kalaallisuinnaq oqaasillit piginnaanngorsarneqarnissaat sullisiginiarpaa.

- Soorunami Inuit Ataqatigiit suliniutaat suleqataaffigissavakka, kisiannili kallaalisuinnaq oqaasillit qallunaatut piginnaasaqannginnertik pissutigalugu periarfissinneqartannginnerat suliniutiginiarpara. Assersuutigalugu inunnik isumaginninnikkut sullissisut piginnaanngorsarneqarnissaat pingaartippara.

Juliane Henningsen Nuummi Ilisimatusarfimmi allaffissornikkut tunngasunik ukioq manna ilinnialeluni aallartissimasoq maanna ilinniarnini unitsikkallarlugu inatsisartuni sulinissi aalluuniarpaa.