Immikkut ilisimasalik suliumajunnaartoqalersaarnemut: Suli tupaallannartoqariaannaavoq
Juullisioriarnissannut timmisartoqqaassaguit nalliuttorsiornissat qatangiinnariaavoq.
Saqisummi Air Greenlandilu isumaqatigiissutitaassamittut siunnersuut akerleralugu decembarip aappaani aallartittumik suliumajunnaarniarlutik nalunaarput.
Sulili tupaallannartoqariaannaasoq, silannakkut angallassinernik misissueqqissaartartoq Danmarkimi Sydbankenimeersoq oqarpoq.
Air Greenlandimi tassanilu saqisut timmisartuni sulisut peqatigiiffianni (FPU) ilaasortaasut aaqqiagiissitsiniartarfimmi, Forligsinstitutionenimi, ullumi marlunngornermi isumaqatigiinniarsaralutik naapipput.
Tallimanngorpat suliumajunnaarniarunartut
FPU Air Greenlandilu nutaamik isumaqatigiissuteqarniarlutik ullumi marlunngornermi naapipput.
Tallimanngorpaatinnagu, tassa decembarip aappaaniutinnagu, isumaqatigiissimanngikkunik, saqisut suliumajunnaarniarput.
Kingullermik apriilimi poorskinngitsiartoq suliumajunnaarnilersaartoqarpoq. Sulili taamaaliornatilluunniit taamaatippaat. Tassami Dansk Metal Air Greenlandilu Købehavnimi aaqqiagiissitsiniartarfimmi apriilip aappaani nutaamik isumaqatigiissuteqarput.
Illuatungeriit taakkua nutaamik isumaqatigiissuteqarnissamik tungaanut aaqqiagiissitsiniartarfimmi ulloq ilivitsuunngitsorluunniit issiapput.
- Aaqqiagiissitsiniartarfimmi tupaallannartoqartareernikuuvoq. Maannamulli suli iluatsinngitsumik isumaqatigiinniarsarinerat sivitsuuttoortoq qularnanngilaq, Jacob Pedersen oqarpoq.
AAMMA ATUARUK Hvis Air Greenlands personale strejker, kan du få refunderet din billet
Air Greenland taassumalu saqisui siorna oktobarimili isumaqatigiinniarsarilerput. Aprilimili suli angusaqarfiunngitsumik isumaqatigiinngittuarsinnarmata saqisut suliumajunnaarniartut FPU nalunaarpoq.
Saqisut akissarsiaqarnerulerumapput. Air Greenlandillu tamanna akuersaakannerpaa, saqisulli piffissap suliffigisamik nikerarsinnaanerunissaa piumasaralugu.
Sulisut periarfissarissaartut
Taakkunannga sorliit periarfissarissaarnerunersut oqaatigineqarsinnaanngitsoq, Jacob Pedersen oqarpoq.
Suullu tamangajammik akitsoraluttuinnarmata saqisut akissarsiaqarnerulernissamik massakkorpiaq piumasaqarnerat inissaminiippoq.
- Saqisut akissaatigissaarnerpaanngitsut akornanniikkajuttuusut pisiassat akitsoraluttuinnarneranni akissariaqarnerulerusuttut paasisinnaavakka, Jacob Pedersen oqarpoq.
AAMMA ATUARUK Ida om mulig strejke hos Air Greenland: Jeg klamrer mig til håbet
Saqisullu timmisartuutileqatigiiffinni allani massakkorpiaq suliffittaariaannaapput, taamaammallu aaqqiagiinnginnermi Air Greenlandiminngarnit tunngaviatigut periarfissarissaarnerupput.
- Timmisartuutileqatigiiffiit akornanni assigiinngitsorpaalunnik massakkorpiaq sulisussaalatsisoqarpoq. Taamaammat saqisut nooriaannaagunik Europamilu sumi tamaani suleriaannaagunik suliffissaqarluarput, silaannakkut angallassinernik misissueqqissaartartoq oqarpoq.
Air Greenland SAS-itulli kukkuluttornaveersaarli
Air Greenlandilli aningaasaqarnikkut patajaatsumik inissisimanerminik attassiinnarusunnera aamma inissaminiilluinnartoq, silaannakkut angallassinernik misissueqqissaartartoq isumaqarpoq.
Tassami Nuummi Ilulissanilu mittarfittaassuassat 2024-mi atoriaannanngussapput, timmisartuutileqatigiiffiillu allat pilersaarutit malillugit taakkununnga taakkunaniillu aamma timmisartuussisassapput. Air Greenlandillu nunatsinni timmisartuutileqatigiiffituaajunnaarluni timmisartuutileqatigiiffinnik allanik unammillerteqalernissaaa eqqarsaatigigaanni aningaasaqarnikkut patajaalluinnartumik inissisimasariaqarpoq.
Aaqqiagiissitsiniartarfik
- sulisitsisut sulisullu nutaamik isumaqatigiissuteqarnissamut isumaqatigiissinnaanngikkaangata akunnermiliuttuusarpoq.
- aaqqiagiinngittoqarnissaanik, suliumajunnaarnissanik mattussinissanillu ingalassimaniartitsisarpoq.
- illuatungeriik isumaqatigiinniarnissamik pinngitsaalisinnaavai, taakkualu aamma aqqiagiissinniartussaallugit.
- suliumajunnaarnissanik mattussinissanillu sapaatit akunnerinik marlunnik sivisussusilimmik kinguartitsisinnaatitaavoq.
- Københavnimi Sankt Annæ Pladsimiippoq.
Tusarfik: forligsinstitutionen.dk
Skandinaviamimi timmisartuutileqatigiiffiup, SAS-ip, akigititaminik Skandinaviami timmisartuutileqatigiiffiit allat akigititaannut appasinnerujussuarnut ukiuni qulikkuutaani kingullerni naleqqussaavoq.
- Taamaammat assersuutigalugu SAS-ip timmisartuutileqatigiiffinnik allanik ukiuni kingullerni 25-ni unammillerteqarnera eqqaassagaanni Air Greenland isumakuluutissaqarpoq. Assingusumillu nalaataqaratarsinnaanissi soorunami piareersimaffigerusullugulu ingalassimaniarpaa, Jacob Pedersen oqarpoq.
SAS taassumalu saqisui ukioq manna aamma aaqqiagiinngillat, saqisuisalu ilaatigut coronap tuniluunnerani ajornartoornerup malitsigisaanik akissarsiaqarnerulerumapput.
