Air Greenlandimi sulisut suliumajunnaassappata billetip nalinga utertissinnaavat

Air Greenlandip timmisartuutaani saqisut decembarip aappaanniit suliumajunnaarnissartik siunniuppaat.

Taama Air Greenland tusagassiuutinut nalunaarummik allapput.

Suliumajunnaartoqassappallu nunatta iluani nunattalu avataanut timmisartuussinissaraluit unitsinneqarataannaasut Air Greelandip ilimasaarutigaa.

- Suliumajunnaartoqassagaluarpat timmisartuussinissamut billetsit eqqorneqartut qanorluunniit ittuugaluartut utertinneqassapput. Decembarip aappaaniit 16-iat ilanngullugu angalasussat suliumajunnaartoqassagaluarpat suliumajunnaartoqassanngikkaluarpalluunniit apeqqutaatinnagu billetsiminnik utertitsisinnaalereerput, Air Greenland tusagassiuutinut nalunaarummi allappoq.

AAMMA ATUARUK Andet strejkevarsel er sendt til Air Greenland - men parterne skal nu i forhandling

Air Greenlandimi timmisartumi sulisut peqatigiiffianniit (ACU) danskit kattuffianni Flyvebranchens Personale Union, FP-mi ilaasortaasut suliumajunnaarnissamut aappassaanik ilimasaaruteqarsimasut Air Greenland sisamanngornermi ilisimatinneqarpoq.

Air Greenlandimi pisortaaneq, Jacob Nitter Sørensen, nalunaarummut ajuusaarlunilu timmisartuussinissat unitsittariaqarnissaannut killittoqassanngitsoq kissaatigaa. Isumaqatigiissitsiniartartulli aaqqiiagiissaaniartartut aaqqiissutissamik nassaarsinnaanissaa neriuutigaa.

- Timmisartumi sulisugut iluareqaagut, nalunngilaralu atuisutta aamma iluareqigaat. Soorunami tamaanga killinnissaq kissaatiginngikkaluarparput, neqeroorutigisagulli piviusorsiortuusut eqqortumik unneqqarilluta oqartariaqarpugut, Jacob Nitter Sørensen oqarpoq.

- Isumaqatigiissut nutaaq naapertorlugu immikkut ittumik aningaasartuutigiligassagut taamaallaat billetsit akii atorlugit matussusersinnaavagut. Siunissami patajaannerusumik inissisimaniarutta pisariaqartipparput – siunissami unammillerneq aqqusaagassarput nammassinnaassagutsigu aningaasaqarnikkut aamma taamaattariaqarpoq.

Billitsisifferni angalanissat allanngortissinnaavat

Billitsit allanngortinniarukku Air Greenlandip nittartagaatigut uunga iserlutit allanngortissinnaavat. Billitserli angalatitsivimmit allamit pisiarisimagukku angalatitsivit pisiffiit attavigalugu allanngortitsisinnaassaatit.

Illuatungeriit marlunngornermi novembarip 29-ani nalunaaqutaq ulloqeqqanut aaqqiiagiissaaniartartunit ataatsimiinnissaminnut aggersarneqarput, illuatungeriillu tassani isumaqatigiinniassapput.

Aningaasanik utertitsineq aningaaserivimmut korti sorliunersoq apeqqutaalluni sapaatit akunneri ataatsimiit arfinillit angullugit sivisussuseqarsinnaasoq, timmisartuutileqatigiiffiup ilanngullugu oqaatigaa.

Air Greenland Forligsinstitutionimi ataatsimiinnerup qanoq inerneqarnissaata paasinissaata tungaanut pisisartut angalanissaminnik pilersaarusiornissaminnut periarfissilluarumallugit ataani allassimasunik aalajangiivoq:

1. Suliumajunnaartoqassagaluarpat timmisartuussinissamut billetsit eqqorneqartut qanorluunniit ittuugaluartut utertinneqassapput.
2. Pisisartut decembarip aappaaniit 16-iat ilanngullugu angalasussat suliumajunnaartoqassagaluarpat suliumajunnaartoqassanngikkaluarpalluunniit apeqqutaatinnagu billetsiminnik utertitsisinnaalereerput. Pisisartup neqeroorut akuerisimaguniuk suliumajunnaartoqanngitsoorpallu angalaniarluni aalajangeruni niuernermi atugassarititaasut nalinginnaasut naapertorlugit nutaamik billetsisisariaqarnissani eqqumaffigissavaa. Billetsimik utertitsinissamut qinnuteqarniarlutit immersugassaq una atorlugu Atuisunut sullissivimmut saaffiginnigit.
3. Pisisartut decembarip aappaaniit 16-iat ilanngullugu angalasussaagunik ulloq alla angalasinnaanissaminnut billetsertik allanngortissinnaalereerpaat. Allannguineq aqqummi angalaffissami taamaallaat atorsinnaavoq, aammalu decembarimi, 2023-mi januaarimi imaluunniit 2023-mi februaarimi taamaallaat atuuppoq. Maluginiaqquneqarpoq juullilernerani sapaatit akunnerani 51-imi angallassinissani amerlanerpaani inissat ikitsuinnanngormata. Atuisunut sullissivik immersugassaq una: https://kundeservice.airgreenland.gl/hc/da/requests/new atorlugu allannguinissamut saaffiginnissutit tulleriiaarneri malillugit taamaallaat sullississaaq.
4. Billetsit angallassinissamut sullissisumiit pisiarisimagukku taanna utertitsinissaq allannguinissarluunniit pillugu saaffigissavat.