Air Greenlandimi sulisut suliumajunnaarataannaanerat timmisartorlutik juullisioriartussat ilaasa ernummatigaat.Assi: Henriethe Simonsen

Ida suliumajunnaarataannaanermut: Najummarteqqanartorujuuvoq

Air Greenland juullikkunni suliumajunnaarataannaaneq kalerriutigimmagu angalasussat ernumapput.

Juulli eqqissisimanarlunilu tipaatsunnartuusaraluartoq, nunatsinni juullikkut ukiutoqqallu nalaani timmisartumik angalasussat ernumapput.

Air Greenlandip timmisartuni sulisumi suliumajunnaarsinnaanerannik sapaatit akunnerata aallartinnerani tusagassiutinut nalunaarluni ilimasaarivoq.

Air Greendip taassumalu timmisartuutaani sulisut peqatigiiffiata ACU-p, Danmarkimi kattufiup Flyvebranchens Personale Unionip, FPU-p ataaniittup sivisuumik isumaqatigiinniareerlutik angusaqanngmata, Air Greenland suliumajunnaarnissamik FPU-miit ilimasaarummik siullermik nassinneqarpoq. 

Juullip ukiutoqqallu akornanni angalasussat ilaat Nuuk Centerimi KNR-imit naapippagut. Taakkulu suliumajunnaaratartoqarsinnaanera paasiuminaatsillugulu ernumassutigaat.

Ida Mathiassen Andersen 

Air Greenlandip sulisui juullip nalaani suliumajunnaarataannaallutik kalerriipput. Tamassuma nalaani angalasussaalluni taama tusarluni qanoq ippa?

- Najummarteqqanartorujuuvoq. Eqqugaaqinagama assorujuk najummatseqqalaarpunga pissangallungalu tusarnissannik malinnaaffigivakka.

Qanoq igaajuk suliumajunnaarataannaallutik kalerrisaarinerat?

- Soorunalimi pisussat aamma angallavissat tamatuma nalaani annertusaqigamik aamma, tassani inissisimanera aappaatigut eqqarsarnalaarpoq pissutigalugu inuppassuit angalasussaavugut, taavalu najummatseqqanerit allallu ernumanerit, Danmarkimummi aallarutta, uternissatsinnummi suliumajunnaarpata?

Siornatigut suliumajunnaartoqarnera nalaatereerpiuk?

- Ija, upernaaq aamma påskep nalaani Tasiilamut påskesioriartussaalluta tassani aamma eqqaamavara assorujuk najummatseqqalluta. Aallassaagut? Aallassanngilagut? Assorujuk ernumalluta aamma misigivunga.

Maannakkut taama pisoqarnera qanoq igaajuk?

AAMMA ATUARUK Air Greenland aalajangiusimasoq: Timmisartuni mekanikerit suliumajunnaarniartut mattunniarai

- Tassami, soorunalimi uannut ernumanaqaaq, aammma apeqquterpassuit; ilumut utimut aqqutissaq, immaqaluunniit siumut aqqutissaq matussappat? Taava ernumanarami assut. Tassani inissisimavunga eqqarsarnartumi. Toqqissisimananga angalassuunga immaqa.

Magdaline Lynge

Air Greenlandip sulisui juullip nalaani suliumajunnaaratarsinnaallutik kalerriipput, tamassuma nalaani angalasussaalluni taama tusarluni qanoq ippa?

- Soorunami ernumanarpoq, Upernavimmut apuukkusukkama.

AAMMA ATUARUK Air Greenlandimi sulisut juullip nalaani suliumajunnaaratarsinnaasut

Qanoq igaajuk suliumajunnaaratarsinnaallutik kalerrisaarinerat?

- Soorunami assorsuaq ernumaammerpunga, apuutinngitsuussasoralunga Upernavimmut.

Heidi Dalager Ilulissanut juullisioriarniarapoq.

Air Greenlandip sulisui juullip nalaani suliumajunnaaratarsinnaallutik kalerriipput, tamassuma nalaani angalasussaalluni taama tusarluni qanoq ippa?

- Soorunalimi ernumanalaarpoq ilaquttakka malillugit juullisioriartussaagama, massakkullu specialiliara piareerlugu kiisami suna tamaat iperarlugu juullisioriartussaagama, pinngitsoornissaa ernumanalaarpoq.

Qanoq igaajuk suliumajunnaaratarsinnaallutik kalerrisaarinerat?

- Soorunalimi neriuppunga arlaatigut isumaqatigiissuteqarumaartut peqquteqarsimassammat sooq suliumajunnaarnersut.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl