Immiaq inerteqqutaaginnassaaq

Immiortarnerup inerteqqutaanera amerlanngitsunit unioqqutinneqartaraluartoq pisariaqarpoq, Ann Birkekær Kjeldsen, Peqqissutsimut naalakkersuisoqarfimmi pisortaq taama oqarpoq.

- Innuttaasut misissuiffigigaagatsigit imigassartornerup kingunipilui soorlu kinguaasiutitigut atornerluinerit, persuttaanerit, pinngitsaaliinerit imminullu toquttarnerit nalunngilagut. Taamaammat una inatsit pisariaqarpoq, innuttaasummi killeerullutik angerlarsimammi immiuinnarsinnaanngillat qanorsuarlu aalakoornissaminnut aqqutissinneqarlutik, Peqqissutsimut naalakkersuisoqarfimmi pisortaq, Ann Birkekær Kjeldsen taama oqarpoq.

Aamma immiortarneq inerteqqutaajunnaassagaluarpat qanoq kinguneqarumaarnersoq oqaatigisinnaannginnerarpaa, immiornerlu inerteqqutaajunnaassagaluarpat imigassat sakkortuut pissarsiarinissaat ajornannginnerulissangatippaa.

- Nalunngilarpummi kingunipiloqartartoq. Taamaammat anguniakkat suusupagiinnartuusillugit ajornartorsiutit annertusarneqaqqittariaqanngillat, Ann Birkekær Kjeldsen oqarpoq.

Peqqissutsimut naalakkersuisoqarfimmi pisortap isumaa malillugu immiortarnerup inerteqqutaanerata attatiinnarnissaa pisariaqarpoq. Ukioq 2011-mi immiorsimasunik sisamaannarnik nalunaarutiginnittoqarnera, taakkunanngalu marluinnaat unnerluussissummik kinguneqarsimaneri pillugit politiit oqaaserisaat qaammatip massuma aallartilaarnerani Radioavisikkut oqaluttuarivarput.

Immiortarnerulliuna inerteqqutaanera innuttaasunit malinneqarniassammat inatsiseqartoq.

- Maani Kalaallit Nunaanni imigassanut inatsisit sukangasuujusut nalunngilagut. Nalunngilarpummi inuit imigassartorsimanerisa kingunipilorisarsimasai ilisimagatsigit inatsisit taamaapput, Ann Birkekær Kjeldsen oqarpoq.

Taamaammat immiorsimasunik unnerluussinerit amerlagisassaanngikkaluartut immiortarnerup inerteqqutaajunnaarnissaa pilersaarutaanngilaq. Inatsimmi taanna innuttaasut ilisimavaat tassalu immiukkat, viinniliat imigassaliallu pissusissamisuunngitsuuneri ilisimavaat ajoqutaasinnaanerilu politikerinit nalilerneqarsimallutik.

- Qujanartumilli maanni innuttaasorpassuit inatsisinik malinnilluartuupput, inatsisillu taassuma attatiinnarneqarnissaanik qulakkeerinnittuullutik. Aamma inatsimmik taassuminnga unioqqutitsisoqarpallaanngikkaluartoq inatsisip atorunnaarsinneqarnissaanut pissutissaqanngilaq, Ann Birkekær Kjeldsen oqarpoq.

Ilami immiaaqqat, viinnit imigassallu akitsuutersukkat pisiniarfinni pisiassaareerput.

- Una inatsit atorunnaarsinneqassagaluarpat, nunatta karsia isertitatigut annaasaqangaatsiassagaluarpoq, Ann Birkekær Kjeldsen oqarpoq.

Aamma imigassap tuniniagaanera piffissami killilimmi taamaallaat pisarmat inuiaqatigiit akornanni imigassamik pitsaaliuinermut iluaqutaasoq Ann Birkekær Kjeldsen unnersiorpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat