Aalisartut: Aalisartut angallataasa nalunaarsorneqarnissaa kinguartilli

Sinerissap qanittuani umiatsiaararsorlutik aalisartut angallataat ukioq nutaamut iserutta nalunaarsorneqareersimassapput. 

Aalisarneq pillugu inatsit taama piumasaqarpoq. 

Nalunaarsuinissamulli piumasaqaammut ullorititaq sivitsorneqartariaqartoq.

Kullorsuarmi aalisarnermut piniarnermullu peqatigiiffiup siulittaasuat, avannaatalu kommuniata, borgmesteria noqqaassuteqarput.

Sinerissalli qanittuani umiatsiaararsorlutik aalisartut angallatiminnik nalunaarsuiniarnerat ilungersunartorsiorfiusoq, Kullorsuarmi aalisartut piniartullu peqatigiiffianni siulittaasuata KNR-imut oqaatigaa.

Angallatit nalunaarsorniaraanni nittartagaq atorlugu Mitid isissutigalugu immersugassaq aalisartunit immersorneqartussaavoq. Taamaasiornissarlu nunaqarfimmi attaviluttumiilluni kipiluttunartoq, Kullorsuarmi aalisartut piniartullu peqatigiiffianni siulittaasoq, Timotheus Petersen oqarpoq.

- Taakkulu piumasaqaatit maannamut killiffigisatsinni ilaatigut nunaqarfinni attaviluttuniilluni, tusass aqqutigalugu attavinni arriitsuararsuarmik ilaatigut aamma attaveeruttaqattaartarnera pisarnerani MitId atoqqaanngikkutsigu iluamik immersugassat allallu pulaffigisinnaanatigit.

Aalisartut immersugassaat imarsiornermi qullersaqarfiup nittartagaaniippoq, immersugassarlu taanna danskisuinnaq allanneqarpoq, kalaallisullu allannilimmik immersugassaqannginnera aamma aalisartunut ilungersunartorsiortitsivoq.

- Nukingitsannarsimmat ukiaq imaalereermat, ilaatigut ilaasortatta ilai qallunaatut paasinnissinnaanngitsut aamma ilarpassui suli Mitid-mut attaveqanngitsut, tamakkuummata aarlerissutigisannut aallaaviusut, Timotheus Petersen oqarpoq.

Immersugassap nalornissutigineqarnera danskisuinnarlu allaqqanera qanoq aaqqiiviginiarneqarnersoq imarsiornermik qullersaqarfiup KNR-imiit mailikkut paasiniaaffigaarput. Taakku ilaatigut ima akissuteqarput:

- Immersuinissamut nittartagaq ilitsersuutitalik nittartakkatsinniippoq, taannali kalaallisut nutserneqanngilaq, imarsiornermut qullersaqarfik mailikkut akissuteqarpoq.

- Aalisartut ikiorusukkaluarpagut siunnersorlugillu, ajoraluartumilli kalaallisut ikiuussinnaanngilagut, Imarsiornermut qullersaqarfik nalunaarpoq. 

Kullorsuarmi aalisartut maanna ukiup naanissaa ungasigunnaarmat ernumatsapput. Taakkummi aalisarneq ulluinnarni inuussutissarsiutigaat, piumasaqaatinulli naammassinninnissaminnut nalornillutik ikiortissaaleqipput, taamaammat oqartussanut kommuninullu piaartumik noqqaassuteqarput.

- Namminersorlutik oqartussaninngaanniit angalatitsisoqartariaqarpoq imaluunniit kommune namminersorlutik oqartussat peqatigiillutik qanoq iliuuseqarnissaannik kaammattorusunnarput. Imaluunniit aalisarnermut naalakkersuisoq pisaartumik atorfilittaminik angalatitsiniarli.

Aalisarneq pillugu inatsit, ukioq manna januaarip aallaqqaataani atuutilertoq, taama piumasaqarpoq. 

Umiatsiaq aalisarnermi atorneqartoq nalunaarsorneqarsimanngippat, aalisartoq akiliisitnaasinnaavoq.

Avannaata kommunia isumaqataavoq

Ukiorli maannga killippoq nalunaarsugassallu suli amerlasut, taammallu tamarmik piffissaagallartillugu nalunaarsorneqarsinnaanngitsut, Avannaata Kommuniata borgmesteria KNR-imut naliliivoq.

Taamaammat nalunaarsuinissamut periarfissap sivitsorneqarnissaa taassuma noqqaassutigaa.

- Aalisarnermut pisortaqarfik saaffigisariaqarparput piffissamik tuneqqittariaqaraatigut, pissutigalugu una killiffipput ajorluinnartuuvoq. 

- Ilaa umiatsiarparpassuupput taavalu aamma målebrevenik suliaqartartut ima ikitsigipput, ullormut arlalissuilluunniit naammassisaraluarunikkit, ukiumut nutaamut tamarmik naammassineqarsinnaanerat qularnarluni, Lars Erik Gabrielsen oqarpoq.

Angallatit taakku nalunaarsorneqassappata angallat allagartaqartariaqarpoq uppernarsaammik, soorlu angallat qanoq angitigineranut uuttuutit. Avannaanili umiatsiaararpassuit allagartaqanngillat uppernarsaatitalinnik. 

Naallu kommuni ikiuukkaluartoq, aalisartut nalunaarsuinissamut ikiorneqarnissaminnik pisariaqartitsisut borgmesteri oqarpoq.

- Kiffartuussivigut piareersartikkaluarpagut nunaqarfinni illoqarfinnilu tamani, kiffartuussisinnaanera killilerujussuuvoq siullertut taanna piginnaasaq taanna målebreveliornissaq piginnaaneq piginnginnamikku.

Avannaata kommuniani taamatut suliakkiussaqartunut tassalu namminersorlutik oqartussanut, sakkortuumik isornartorsiuivoq. 

- Taannalu pisariusorujussuuvoq, taamaammat ippinnartorujusuuvoq taamatut piumasaqarluni miloriussisoqarnera. Imatut paasinarluni soorlulusooq aalisarnermik ingerlataqartut ikilisarniarneqartut taanna aqqutigalugu, avannaata kommuniata borgmesteria, Lars Erik Gabrielsen oqarpoq.

Aalisarnermut naalakkersuisoqarfik Kullorsuarmi aalisartut peqatigiiffiata, KAPP-p, aamma Avannaata Kommuniata borgmesteriata, Lars Erik Gabrielsenip danskit inuussutissarsiornermut ministerianit nalunaaruteqarneq pillugu ernumassutaannut akissutissamik piareersaasoq, nalakkersuisoqarfik KNR-imut allappoq.

Naalakkerusisoqarfiup nittartakkaminni tusagassiuutinut nalunaaruteqarnermini 'pisortanut pineqartunut qinnuteqaammik nassitsisimanermut uppernarsaanissaq' naammassasoq allappaat.

- Taamaasilluni aalisartut nalunaarsuineq suli inissinneqanngikkaluartoq ukiumut pisassiiviusumut 2026-mut aalisarsinnaanermut akuersissummik pissarsisinnaanerat qulakkeerneqassaaq, taakku allapput.