Kalaallit Nunaata kujataani aalisartut piniartullu ikiorserneqalerput

Kalaallit Nunaata kujataani aalisartut piniartullu sikorsuaqarneranik nalaataqartut aningaasatigut ikiorserneqassasut ersarissivoq, sivitsortumik nalornisoqareernerata kingorna.

Naalakkersuisuninngaanniit 592.457 koruunit aalisartunut 13-inut tapiissutigineqarput.

Taama Aalisarnermut Piniarnermullu Naalakkersuisoqarfik tusagassiuutinut nalunaarummi allappoq.

Ingerlanerit eqqumiitsut

Maanna kujataani aalisartut piniartullu ilaat ikiorsiissummik pissarsisimagaluartut, tamassuma anguniarnera oqitsuinnaasimanngilaq.

Ingammik nalornisilersitsivoq oktoberip qeqqata missaani Peter Olsen IA-meersup oqaatigimmagu aalisartut piniartullu ikiorserneqarsinnaanngitsut.

Inuussutissarsiornermut, Niuernermut, Aatsitassanut, Inatsisit atuutsinneqarnerannut aamma naligiissitaanermut naalakkersuisoqarfiup ikiorsiinissamut pilersitsissoqarnissaanik qinnuteqaataa Aningaasaqarnermut akileraartarnermullu ataatsimiititaliap itigartereermagu taama oqarpoq.

Ikiorsiissutiginiarneqartut kujataani takornarianik sullissaqartunut siullermik eqqarsaatigineqaqqaarsimagaluarpoq kontominngaanniillu allarluinnarminngaanneerlutik.

Sikorsuaqarnerata ajornartorsiortitsinera  

Sikorsuit Kalaallit Nunaata kujataanut februarimiilli takkupput tamassumalu kingorna ajornartorsiuterpaalussuanik nassataqarsimallutik. 

Umiarsuit pilersuisut Qaqortumi upernaakkut puulukeqqapput, umiarsuit takornariartaatit talissinnaasimanngillat, soorlu aamma aalisartut piniartullu taamatuttaaq avalassinnaasimanngitsut.

Eqqugaasut ilaannut maanna tassa ikiorsiissuteqarpoq.

Silap allanngoriartornera pissutigalugu aalisartunit arfineq marlunnik Qassimiuneersunit Aappilattumeersunillu 10.000 aamma 25.000 koruunit akornanni annaasaqaataasutut qinnutigineqarput.

Naalakkersuisunit tamakkiisumik taperserneqarput. Aalisartut arfinillit aamma pilersitseqqinnissamut taperserneqarnissamut qinnuteqaateqarsimapput taperserneqarlutillu 44.000-it 198.000-tillu akornanni, aamma pissarsiaralugu kissaatigisat 75 procentii.  

Kujataani eqqugaasut allat eqqarsaatigalugit ikiorsissuteqartoqassanersoq   - soorlu takornarialerisut  - taamaattoqartarsinnaaneranik tusarsaasoqarpasinngilaq. Naak naalakkersuinikkut suliaqartunit, namminersortunit suliniaqatigiffinniillu nipikillisaarutaanngivikkaluartoq.