Ilulissani toqutsineq: Angut pasineqartoq suli tigummigallarneqassasoq
![](/sites/default/files/styles/image_934x467/public/article_images/ilulissat_forbraending.jpg?itok=e7BfxKMX)
Inuit arlallit Kalaallit Nunaanni Politiinit oktobarip ulluisa arfineq-pingajuanni tigusarineqarput.
Tigusarinninnerit Ilulissani amiilaarnartumik toqutsisoqarneranut atatillugu inuup timaata ilaanik ikuallaavimmi nassaartoqarneranut atassuteqarput.
Tigusarinninnerup kingunerisaanik angut sapaatini akunnerni pingasuni tigummigallagassanngortinneqarpoq, taannalu toqutsisutut pasineqarluni. Tamatuma saniatigut angut iperagaavoq, toqutseqataasimasutulli pasineqarluni.
Eqqartuussiveqarfiup Avannaata angutip ulluni 28-ni tigummigallarneqaqqinnissaa ullumi aalajangerpaa. Kalaallit Nunaanni Politiit KNR-imut paasissutissiipput.
AAMMA ATUARUK Politiit: Pinerluuteqarsimasup iliuuseqaqqinnissaa Iluliarmiut annilaangagisariaqanngilaat
Nunatsinni unnerluussisussaatitaasut angutip tigummigallarneqarneranik sivitsuinissamik noqqaassuteqartuupput, tamannalu eqqartuussiveqarfiup akueraa.
Piffissamik sivitsuineq allaffissornikkut eqqartuussinikkut aalajangerneqarpoq. Tassa imaappoq suliami pasineqartup, illersuisup unnerluussisullu angutip tigummigallaannarneqarnissaa akueraat.
Taamaammat eqqartuussivimmi ullumikkut suliaqartoqanngilaq.
Toqutsineq amiigaarnartoqartoq misissuingaatsiartoqarneranik kinguneqartoq
Ilulissani ikuallaavimmi inuup timaata ilaanik oktobarip ulluisa aappaani nassaartoqarnerata kingunerisaanik suliaq aallartinneqarpoq. Oktobarip ulluisa tallimaanni ikuallaavimmi timip ilaanik nassaartoqaqqippoq.
Politiit qatserisartullu ikuallaavimmi paasissutissanik ujartuillutik ullorpassuarni misissueqqissaarput.
AAMMA ATUARUK Ilulissani toqutsinermut suliaq: Politiit toqunneqartup kinaassusaa saqqummiuppaat
Suliami peqqarniitsumik iliuuseqartoqarsimanera pissutigalugu Kalaallit Nunaanni Politiit Danmarkimut ikiortissarsiorput. Pinerluttoqarsimatillugu toqusunillu misissuisartut Ilulissanut toqunneqarsimasup kinaaneranik qanorlu toqusimaneranik misissuiartorlutik tikipput.
Paasissutissarsiat kingunerisaanik politiit najukkami annertuumik suliaqarput, inuillu marluk pasineqarlutik.
Kalaallit Nunaanni Politiit toqunneqarsimasup aqqa sapaatip akunnerata qaangiunnerani saqqummiuppaat.