Ilulissani qimmit pillugit ilisimatuussutsikkut misissuisoqalersoq
Qimmit qimuttut sananeqaatimikkut ineriartorsimanerat ilisimatuussutsikkut misissorneqarnerannut atatillugu ilisimatuut Ilulissiassapput.
Qimmit qimuttut timaasa sannaasa ilisarnaataannik misissuinissaminnut atugassaminnik qimmit qarnganiit misissugassaminnik ilisimatuut tigusissapput.
Qimmit peqqissusaat misissorneqassasut
Ilisimatuut Avannaata Qimussersuanut sumiiffinnit assigiinngitsunit peqataajartortut qimmii misissugarinissaat neriuutigaat:
- Qimmit qimuttut pitsaanerpaat Ilulissani katersuunneqartussaapput. Qimminillu misissuiniaraanni misissugassarsiorfissaqqeqaaq, misissuinermi "QIMMEQ"-mik taaneqartumi aqutsisoq Morten Meldgaard oqarpoq.
AAMMA ATUARUK Knud Rasmussenip katersai misissorneqassapput
Ilisimatuut Qaanaami Ittoqqortoormiinilu misissuinissaminnut atugassaminnik siusinnerusukkut katersereerput.
Taakku Ilulissaniinnerminni qimmillit qimmit pillugit ilisimasaat oqaluttuassaallu aamma katersussavaat. Taassuma saniatigut qimmit peqqissusaat akeqanngitsumik misissorneqarsinnaallutik:
- Qimmit peqqissusaannut tunngasunik suliaqartut qimmit qimuttut peqqissusaat paasisaqarfiginerorusuppaat, inuillu qimmitik ornittagaagallartumut misissortikkiartorsinnaavaat, Morten Meldgaard oqarpoq.
AAMMA ATUARUK Kitaata kangiatalu qimmiisa siuaasaat assigiinngitsuusut
Suliniut "QIMMEQ" kalaallit danskillu suleqatigiillutik qimmip qimuttup piorsarsimassutsikkut isumaa sananeqaatimigullu ineriartorsimanera pillugit misissuineruvoq.
Ukiut 8000-it matuma siorna qimussertoqartarsimasoq
Ilisimatuut qimmit siuaaminik ilisarnaatai, taavalu qanoq sumilu pinngornersoq suli ilisimanngilaat. Sibiriamili siuaaqarsinnaavoq:
- Qamutit qimmillu saarngi qerisimasut Sibiriap avannaani qeqertani nassaarineqarnikuupput, taassumalu takutippaa ukiut 8000-it matuma siornali qimussertoqartarsimasoq.
Ilisimatuut kalaallit qimmii issittumi amaqqut siuaaqatiginerai aamma paasiniaraat KNR-imit oqaatigereerparput.
Avannaata Qimussersua marsip 24-anni aallartissaaq. Ilisimatuut facebookikkut aamma emailikkut qimmeq-phd@uni.gl attavigineqarsinnaapput Ilulissaniluunniit qimmit akornanni marsip 19-aniit 26-anut naapinneqarsinnaajumaarput.
AAMMA ATUARUK Akiuussutissamik kapisisimanermut uppernarsaateqassasut
AAMMA ATUARUK Avannaata Qimussersuanut peqataaniaraanni qimmit kapineqarsimasariaqarput
