Avannaata Qimussersuanut peqataaniaraanni qimmit kapineqarsimasariaqarput
Avannaata Qimussersuanut assersuutigalugu peqataassagaanni qimmerisat kapitinnissaat taamaattumik qulakkeerneqartariaqarpoq. Avannaata Kommuniani Sanaartornermut Avatangiisinullu Ingerlatsivik taama erseqqissaateqarpoq.
Qimmit akiuussutissamik minnerpaamik marloriarlutik sukkaniutinnginnermi kapitissimanissaat piumasaqaataavoq.
Kapuuineq siulleq sumiiffinni assigiinngitsuni Avannaata Kommuniani januaarip ulluisa 29-anni pissaaq, februarillu aappaata tungaanut tamanna pisussatut pilersaarutigineqarluni.
AAMMA ATUARUK Siorapalummi qimmit nappaalasut
- Qimmiutitit kapitinniarukkit sumiiffinni kommunip allaffianut saaffiginnigit. Siullermik kapisinermi qimmit nappaataannut parvo-virusimullu akiuniarluni kapuuisoqassaaq. Kapuuinerullu aappaa sapaatip-akunnera 9-mi pissaaq, qulaanitulli sumiiffinni kommunip allaffianut saaffiginnittoqassaaq, tassanilu qulaani akiuussutissat kapuuinermut siullermi tunniunneqartut nangillugit kapuuisoqassaaq, kiisalu perlerorneq akiorniarlugu kapuuisoqassalluni, Mathias Mølgaard, Avannaata Kommuniani Sanaartornermut Avatangiisinullu Ingerlatsivimmi pisortaagallartoq oqarpoq.
Qimmiutillit tamarmik qimmiutitik akiuussutissamik kapitinniarlugit saaffiginnissapput, sukkaniunniartullu uani kisimik pineqanngillat, kommuni taama allappoq.
