Siorapalummi qimmit nappaalasut

Kalaallit Nunaanni nunaqarfiit avannarlersaanni Siorapalummi qimmit nappaalanerat pillugu Avannaata Kommuniata Uumasunut Inuussutissanullu Oqartussaaffeqarfik attaveqarfigaa.

Ukioq 2016-ip naalernerani inatsimmik nutaamik aalajangersagaliortoqarpoq, Kalaallit Nunaanni qimmit tamarmik akiuutissamik kapineqartarnissaat inatsisitigut peqqussutaalermat.

Qimmit qimuttut savallu qimmiisa akiuussutissanik kapineqartarnerat Namminersorlutik Oqartussanit akilerneqartarnissaat atuutilersinneqarpoq, qimmillu qimuttuunngitsut savallu qimmerinngisaat piginnituinit akilerneqartalerlutik.

Avanersuarmili inatsisip nutaaq piviusunngortinnissaa Avannaaata Kommuniata ajornartorsiutigisimavaa, tamatumalu nassatarisaanik inatsimmi piumasaqaataasoq akiuussutissiinissaq piviusunngortikkuminaatsissimallugu.

Avannaata Kommuniata tusagassiuutinut naluanaruteqarluni allaaseraa, qimminut qimuttunut inatsimmi piumasaqaataasut piviusunngortinniarlugit kommunemi ullumikkut suliniuteqartoqartoq.

Avannaata Kommunianeersumik qimminik isumaginnittussamik pingasunngornermi Avanersualiartitsisoqassaaq.

Taassuma pikkorissarsimanissamut piumasaqaataasut naammassinikuuai, qimminullu taamaasilluni akiuussutissaliisinnaalluni.

Taassuma saniatigut qimmit nappaataata qanoq siaruartigisimanera nalunaarsussagaa, Avannaata Kommunia tusagassiuutinut nalunaarummi taama ilaatigut allaaserisaqarpoq.