Ilulissani aalisakkerivimmi sulisut 55-it angerlarartinneqartut

Royal Greenland naapertorlugu tunisassiat ikippallaarnerat pissutigalugu sulisut 55-it tallimanngormat angerlarartinneqarnerat pissusissamisoortoq, Royal Greenlandimi pisortaq oqarpoq:

- Pissusissamisoorpoq tunisassiorneq annikillisimammat, tassa Ilulissani uani pineqartumi pilersuisut ilaat kujavarsimapput taavalu fabrikkinut allanut pilersuisunngorsimallutik. Iliuuseqarniarsarivugut assigiiaarnerusumik ukiup ilarujussua tunisassiorsinnaaniassagatta.

Royal Greenland nammineq pisooqataanngitsuunngilaq taamatut sulisussaaleqisarnerminut, SIK-p siulittaasua allagaqarluni taama isornartorsiuivoq.

Taamaattoq Royal Greenland sulissussaaleqisarlunilu avataanik tikisitsisarpoq, illuatungaatigullu sulisunik angerlarartitsisarluni SIK taama qisuariarpoq.

AAMMA ATUARUK Royal Greenlandip nunaqavissunik sulisussarsiniarneq ajornartorsiutigigaa

Angerlarartitsisarnerup sooq aaqqiissuteqarfiusimannginneranut KNR-ip apeqqutaanut Jens K. Lyberth ima akivoq:

- Pissusissamisuussaaq oqaatigissallugu: aalisakkeriviit kisimik taanna ajornartorsiutiginngilaat. Eqqorpoq, ukiorpassuit ajornartorsiutaanikuuvoq, kisianni takusinnaareerparput sulisoqartoq suliartunngitsoornermikkut immaqa ilaasa eqqarsaatigineq ajorpaat suleqatitik ulaperuloortussanngortut imaluunniit kiffartuussatik iluamik kiffartuunneqarsinnaanngitsut, Royal Greenlandimi pisortaq, Jens K. Lyberth taama oqarpoq.

Ilulissani suliffissuarmi massakkut sulisut 115-iupput 55-t angerlartinneqartut.

- Aalisakkeriviit kisimik taanna ajornartorsiutiginngilaat, taamaattumik uanga isumaga malillugu inuiaqatigiinniuna tamanna oqallisigisariaqaraluaripput, iluamik paasiniartariaqaripput sooruna ajornartorsiut taanna ukiorpassuit ajornartorsiutigisimagipput.

Royal Greenlandip attaveqaqatigiinnermut pisortaq Jens K. Lyberth taama oqarpoq.