Hans Peter Poulsenip suleqatini naqqikkai: Illuatungiliuttut kisitsisinik eqqunngitsunik siammarteripput

Inatsisartut ataatsimiittarfianni ulluni makkunani oqallittoqarluavippoq. Ineqarnermut attaveqaasersuutinullu naalakkersuisoq, Hans Peter Poulsen, tatigineqarunnaarmat ullut marluinnaat ingerlaneranni tatiginnikkunnaarnermik taasititsinissamik marloriarluni siunnersuuteqartoqarpoq.

Partiit marluk illuatungiliuttut Naleraq aamma Atassut Poulsenimut tatiginnikkunnaarput, naalakkersuisormi ineqarnermut aaqqissuusseqqinnermut inatsisissatut siunnersuummi paasissutissanik nipangiusimasaqarsimasoq illuatungiliuttut isumaqarput.

Hans Peter Poulsenilli Inatsisartuni suleqatini oqallinnermi paasissutissanik eqqunngitsunik oqaaseqarsimanerarlugit pingasunngornermi ualigaa nalunaaruteqarpoq.

Taanna tusagassiorfinnut nalunaarummi ima allappoq:

- Innuttaasunut attuumassuteqartoq, tassalu inissiat qanoq iluarsartuuteqqissanerlutigit, inissianillu peqqinnartunik qanoq pilersitsissanerluta uterfigisinnaaniassagatsigu, oqallinnermi kisitsisinut tunngatillugu assigiissaarisoqartariaqarsoralugulu naqqiuteqartoqartariaqarsoraara.

Naatsorsuutit pingaartinneqartut

Namminersorlutik Oqartussat inissiaataasa aserfallatsaalineqarnissaanni 3,8 milliardit koruuninik amigaateqartoqarneranik Inatsisartuni oqallinnermi oqartoqarsimasoq, Hans Peter Poulsen oqarpoq.  

Tamannali eqqunngitsoq naalakkersuisoq naqqiuteqarpoq, 2,5 milliardit koruunillu maanna amigaataanerarlugit.  

Taassuma saniatigut kisitsisinut tunngatillugu kinguaattoornerup 7 milliardit koruuninut qaffannissaa taaneqarpoq.   

Taanna kisitsit Hans Peter Poulsenip eqqornerarpaa, siunissamulli naatsorsuutaanerata erseqqissaatiginissaa taassuma pingaartillugu.  

Tassa akiligassaq maanna akilerneqanngippat akiligassat qanoq amerlitigisinnaanerinik naatsorsuutaasoq erseqqissaatigalugu.

Aaqqissuusseqqinnerit annassutaassasut

Hans Peter Poulsen sioqqullugu naalakkersuisuusoq, Naaja Nathanielsen, KNR-imut siorna upernaakkut oqarpoq taamani iliuuseqartoqarnissaa apeqqutaalluinnassasoq.

Tassa naatsorsuutinut tunngatillugu kinguaattoornerup qanoq kinguneqarnissaa iliuuseqarfigineqartariaqartoq taanna taamani oqarpoq.

- Aningaasat taakku iliuuseqannginnitsinni ullut tamaasa amerliartorput. Ajornartorsiut tamanna ullormiit ullormut aaqqinneqarsinnaanngilaq pissutsillu ukiorpassuarni aaqqinniagassaapput. Taamaammat maanna iliuuseqartariaqarpugut, taanna maajimi 2023-mi oqarpoq.

Aningaasaqarnermut Siunnersuisoqatigiit siulittaasuattaaq, Torben M. Andersen, isumaqataavoq.

Siusissukkut aaqqissuusseqqinneq iluaqutaaginnassasoq pingaaruteqartorlu taanna taamani oqarpoq:

- Ukiummi qulit 15-illu qaangiuppata kinguaattooruteqaqqissinnaaneq ingalassimaniarutsigu aaqqissuusseqqinnissaq pingaaqaaq. Taamaammat tamanna qanoq ingalassimaniassanersoq misissortariaqarpoq, taanna oqarpoq.

Qisuariaat piviusorsiortoq

Maannali iliuuseqartoqartariaqartoq Hans Peter Poulsen tusagassiuutinut pingasunngornermi nalunaarummi erseqqissaavoq:

- Aserfallatsaaliuinissami kisitsit sunaagaluarnersoq saqqummiunneqaraluarpalluunniit, aserfallatsaalineqarsimanatik iliuuseqarfigineqartariaqartut annertummata avaqqussinnaanngilarput, taanna allappoq nangillunilu: 

- Aningaasat atorsinnaasagut, sanaartornermillu suliallit piginnaasaat killeqarmata, Namminersorlutik Oqartussat inissiaataat ataatsikkut iluarsartuuteqqissinnaanngilagut. Pisariaqartinneqartut 2,5 mia. koruuniusorineqaraluarpata imaluunniit 7 mia. koruuniusorineqaraluarpata, tassa taakkua atugassarititaasut.

Pilersaarutittaaq piviusunngortinneqarsinnaasup saqqummiunnissaa pingaaruteqartoq naalakkersuisoq aamma allappoq.

Nammassinnaasarmi sinnerlugu ataatsikkut iliuuseqaraanni ilungersunarsivallaarsinnaavoq:

- Pissutsinik piviusunik aallaavilik, inissianillu iluarsartuusseqqinnissamik qulakkeerisussamik, siunissamilu najugaqarfiit aningaasaqarnerinik aalaakkaalersitsisussamik, nutarterinissami pilersaarut aningaasalersugaq Naalakkersuisunit saqqummiunneqarnikuuvoq.

- Kinguaassatta ajornartorsiutigisatta assinginik ilungersuuteqannginnissaat imaluunniit uagut akiligassatsinnik akiliinnginnissaat aalajangiisuuvoq, Hans Peter Poulsen tusagassiorfinnut nalunaarummi taama naggasiivoq.