Meeqqat innarluutillit assilisaminnik nunami allami saqqummersitsissasut

Meeqqat innarluutillit Sisimiuni septembarimi ataatsimoorrapput.

Taakku pinngortitap qanoq atorneqartarsimanera paasiniarlugu assiliivilisarlutik pinngortitamiipput.

Tilioq sulinummi aaqqissuisuuvoq, suliniullu taaneqarpoq ”Tamanut pinngortitaq”.

Sisimiormiu assiliisartoq Arnajaraq Støvlbæk utoqqaallu innuttaasut suleqatigineqarput, siunertarineqartullu pingasuupput.

Arnajaraq Støvlbækip inuusuttut innarluutillit assiliinermik ilinniartillugit saqqummiivigai. Taassuma saniatigut kalaallit qanga oqaasii aamma oqaatsit pinngortitamut tunngasut ilinniarpaat. Assi © : Tilioq

Meeqqat innarluutillit pinngortitamiillutik assiliinermik ilinniaatigalutik kalaallit pinngortitaq qangaanerusoq qanoq atorneqartarneraat ilinniarpaat.

Suliniullu soqutigineqarluarsimasoq inuit innarluutillit oqaaseqartartuat, Anja Hynne Nielsen, oqarpoq.

- Meeqqat nuannisaqisut maluginiarpara, aamma taamatut aaqqissuussinerit amerlanerunissaat atuarfinnit kissaatigineqarpoq. Meeqqat pinngortitamiikkusunnerulissasut neriuutigaarput.

Peqataatitsineq pinngortitarlu

”Tamanut pinngortitaq” sapaatit-akunnerini marlunni pivoq peqataasullu eqimattanut marlunnut avinneqarput.

Meeqqat timimikkut innarluutillit sapaatip-akunnerani siullermi ilinniartinneqarput, meeqqallu eqqarsartaatsimikkut innarluutillit sapaatit-akunnerata aappaani sammineqarlutik.

Innarluutillit affaat pinngortitamiinnerorusuttartut danskit 2021-mi nalunaarusiaanni allaqqavoq, inuillu tallimaagaangata sisamat pinngortitamiinnerminni eqqarsartaatsimikkut peqqinnerulersutut misigisarput.

Taakku kisitsisit nunatsinni innarluutilinnut qanoq sanilliunneqarsinnaanerat ilisimaneqanngilaq. Pinngortitamiinnerli meeqqamut innarluutilimmut iluaqutaasimasoq ataataasoq, Hans Nielsen, oqarpoq.

- Nunameeqataasimavoq aamma pinngortitami nuniassimavoq, pinngortimiissimaninilu soorunami eqqarsartaatsimigut pissarsiaqaatigisimassavaa, taanna oqaluttuarpoq.

Meeqqat innarluutillit aamma innarluuteqanngitsut ataatsimoornerulernissaat suliniummi aamma anguniarneqartoq, Anja Hynne oqaluttuarpoq.

- Meeqqattaaq akornanni tamanut inissaqartitsineruneq peqataatitsinerunerlu siunertanut ilaapput.

Nunami allami saqqummersitsissasut

Meeqqat assilisaat Sisimiuni Taseralimmi oktobarip naalernerani saqqummersinneqarnissaat pilersaarutaavoq.

Suliniummili naammassisat nunatta avataani aamma siammarneqarnissaat siunertaasoq, Anja Hynne Nielsen oqarpoq.

- Nunanik avannarlernik suleqateqarnissarput qilanaaraarput. Assilisat Norgemi aamma saqqummersinneqarnissaat pilersaarutaavoq. Tamanna meeqqanut tulluusimaarnassaqaaq, taanna naggasiivoq.