Naleraq tatiginnikkunnaarnissamik taasisitseqqusisoq: Naalakkersuisunut ilaasortat akisussaanerannut inatsimmik unioqqitsineraasut

Tatiginnikkunnaarnissamik taasisitsinissap pingajussaa Naleqqamit maanna siunnersuutigineqarpoq. Ineqarnermut naaalakkersuisoq Hans Peter Poulsen naalakkersuisunut ilaasortat akisussaanerannik unioqqutitsisimasoq, Naleraq isumaqarpoq.

Allattoq Markus Valentin

oktobarip 17-at 2024 16:25

Nutserisoq Mads Lynge

Inatsisartuni tatiginnikkunnaarnermik aammaarluni taasisitsisoqartoq.

Naalakkersuisumik Hans Peter Poulsenimik (S) tatiginnikkunnaarluni taasisitsisoqarnissaa Atassutip ippassaq siunnersuutigaa, tatiginnikkunnaarluni taasisitsineq Naleqqap isumaqatigaa.

Hans Peter Poulsenip siunnersuut akuerineqassatillugu, ineqarnermut innuttaasunut atuisunut siunissamut ineqarnermut akiliutaalersussat kingunissaalu tamakkiisumik saqqummiutinngikkai illuatungiliuttut isumaqarput. Ineqarnermut aaqqissuusseqqinnissamut siunnersuummut atatillugu oqallittoqarnerani taamaaliorput.

Hans Peter Poulsenili naalakkersuisoqatigiinnit taperserneqarpoq, taakkumi isumaqarput tatiginninnginnermut taasisoqarnissaanik siunnersuut immikkoortumut oqaluuserineqartumut tunngassuteqanngitsoq.

Nalerarlu naalakkersuisumut pineqartumut tatiginnikkuunnarnissamik taasisitsisoqarnissaa siunnersuutigaa, tatiginnikkkunnaarmik pingajussaa taasisoqarluni.

Naalakkersuisunut ilaasortat akisussaanerannut inatsimmik unioqqitsineraasut

Naalakkersuisunut ilaasortat akisussaanerat pillugu inatsimmit tigulaakkat

Naalakkersuisunut ilaasortat akisussaanerat pillugu Inatsisartut inatsisaat nr. 6 13. maj 1993-imeersoq

§ 6. Naalakkersuisunut ilaasortaq § 10 naapertorlugu pineqaatissinneqassaaq piaaraluni imaluunniit mianersuaalliorujussuarnermigut Inatsisartut Naalakkersuisullu pillugit Inatsisartut inatsisaat inatsisilluunniit allat malillugit imaluunniit atorfimmi suunera malillugu imminut pisussaaffigisassanngortitaasut malillugit iliunngikkuni.

Imm. 2. Imm. 1-imi aalajangersagaq aamma atorneqartassaaq Naalakkersuisunut ilaasortaq eqqunngitsumik paasinerluutaasinnaasumilluunniit inatsisartunut paasissutissiisimappat imaluunniit inatsisartut oqaluuserisassamik oqaluuserinninneranni paasissutissanik oqaluuserisap inatsisartunit aalajangiiffigineqarnissaanut annertuumik pingaaruteqartunik nipangiussisimappat.

Naleraq isumaqarpoq Hans Peter Poulsen naalakkersuisunut ilaasortat akisussaanerannut inatsimmik unioqqutitsisimasoq. Hans Peter Poulsenimi ineqarnermut aaqqissuusseqqinnermut inatsisissatut siunnersuummut aningaasalersueriaasissat assigiinngitsut pillugit paasissutissanik nipangiusimasaqarsimasoq, taakkua isumaqarput.

- Ineqarnermut Attaveqaasersuutinullu Naalakkersuisoq Inatsisartunit suliakkerneqarpoq
aningaasalersueriaatsit taakkulu eqqortumik atuutsinneqarnissaanik suliaqaqqullugu, ilaatigut
piginneqatigiilluni inissianut tunngasunut.

- Naalakkersuisup nammineq peqquneqarsimanini innersuuppaa, siunnersuutiminili eqqortumik
atuutsinneqarnissaanik innersuussaqarani.

- Taamaammat Ineqarnermut Attaqevaasersuutinullu Naalakkersuisoq pisussaaffini malinnagu imaluunniit Inatsisartut isummerfissaanut
pingaarutilimmik nipangiussisimarpasippoq.

Isornartorsiuineq aammaarluni ilumuunnginneraraa

Inatsisartut ataatsimiinnerat siviisujaamik unikkallaareersorlu ataatsimiittoqaqqilermat naalakkersuisoqatigiit Siumut Inuit Ataqatigiillu tatiginnikkunnaarnissamik taasisitsisoqarnissaanik pinngitsoortitsinissamik siunnersuuteqarput.

- Ineqarnermut aaqqissuusseqqinnissaq pillugu inatsisissatut siunnersuut saqqummiummagu kisitsisit eqqortut saqqummiukkai naalakkersuisut isumaqarput, Mimi Karlsen, Inatsisartut siulittaasuat oqarpoq.

Múte B. Egede (IA) oqaluttarfimmit aamma oqaaseqarpoq:

- Kisitsisit naatsorsorneqarsimasut naalakkersuisut saqqummiukkaangatigit apeqqusiisoqarneq ajorpoq. Isornartorsiuissatilluni suna isornartorsiornerlugu ersarissumik oqaatigineqartariaqarpoq.

- Naalakkersuisup siunertaq naapertorlugu sulinera tatigilluinnarpara, Muté B. Egede oqaluttarfimmit oqarpoq.

Jens Napãtôĸ´(Naleraq) oqaluttarfimmit aamma oqaaseqarpoq, Naleqqallu tatiginninnginnera tassani attallugu oqaatigalugu.

Pineqartoq oqaaseqartoq

Suliami pineqartoq naalakkersuisoq Hans Peter Poulsen isornartorsiorneqarnini pillugu oqaluttarfimmiit oqaaseqarpoq.

- Ataatsimiigiaqqusigama Naleraq peqataaniarnani nalunaarpoq. Aningaasalersueriaasissat assigiinngitsut taamanikkut saqqummiuppakka, aningaasalersueriaasiusinnaasunullu sunniutaasinnaasut aamma nassuiarlugit.

- Tusagassiorfinnut nalunaarutinni paasissutissiissutigisakka allannguuteqanngillat. Paasissutissiivigisakka tamaasa assigiimmik paasissutissiivigaakka, taanna oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.