Illuatungiliuttut: Kim Kielsen nassuiaasariaqalerpoq
Aalisarnermut naalakkersuisup, Karl-Kristian Krusep ukioq manna avaleraasartoortassanik pisassiinissamut agguaassinnginnermi qinnuteqartussanut piumasaqaatit suliareriarlugit, Naalakkersuisunut akueritissimagai, aatsaallu tamatuma kingorna tunisassiorfimmut qinnuteqartumullu, KNT Aps-imut attuumassuteqartuunini tamanut nalunaarutigalugu.
Naalakkersuisut siulittaasuannit tamanna maanna nassuiarneqartariaqalerpoq. Partii Naleqqap siulittaasua, Hans Enoksen aamma Inuit Ataqatigiit siulittaasuat, Sara Olsvig taama piumasaqarput.
- Nunatsinni maannakkorpiaq inuussutissarsiutini pingaaruteqarnerpaajusumi, tassalu aalisarnermi, soqutigisanik akulerussisimanertut inissisimanerit amerlavallaalerput. Aamma pisut maanna saqqummeqattaalersut qiviaannarutsigit, Nunatta ingerlatsinera apeqquserneqarujussuarsinnaavoq, Sara Olsvig taama KNR-imut oqarpoq.
Aamma atuaruk SIK KNT Aps-imut: Akiliisinnaajunnaaginnaritsi
Naalakkersuisut massakkorluinnaq tutsuiginassutsiminnik innuttaasunut takutitsisariaqalersut, Partii Naleqqap siulittaasua, Hans Enoksen isumaqarpoq imalu nangilluni oqarluni:
- Naligiimmik eqqortumillu sulissusinissaq Naalakkersuisut siulittaasuata aamma qulakkeertussaavaa. Massakkullu nalunaarutigineqartumi taamaattoqarsimanngilaq. Taamaammat naalakkersuisut siulittaasuat toqqorsimaannarunnaarluni nuilluni qanoq iliuuseqartariaqalerpoq, Hans Enoksen KNR-imut oqarpoq.
Aamma atuaruk Avaleraasartoortassanik agguaassinermi sinaakkutissat Krusep siuttuuffigai
Naalakkersuisup qinnuteqartussanut piumasaqaatit suliarai
Aalisarnermut naalakkersuisup, Karl-Kristian Krusep avaleraasartoortassanik pisassiinissamut agguaassinnginnermi qinnuteqartussanut piumasaqaatit suliareriarlugit, Naalakkersuisunut akueritissimagai, aalisarnermut naalakkersuisoqarfimmi pisortap, Jørgen Isak Olsenip KNR-imut ullumi uppernarsarpaa ima oqarluni:
- Soorunalimi aalisarnermut naalakkersuisuugami aalisarnermut sinaakkutissanik saqqummiinerni taanna saqqummiisussaavoq.
- Tassa imaappa avaleraasartuunik pisassiinissammi suut piumasaqaataanersut suliarereerlugit Naalakkersuisoqatiminut saqqummiussai Naalakkersuisunit akuerineqartut?
- Aappi tassa taamaappoq, Jørgen Isak Olsen taama KNR-imut oqarpoq.
Partii Naleraq: Ippinnartoqarpoq
Tamannalu ippinnartoqartoq, Partii Naleraq isumaqarpoq.
- Tamannalu pisortaqarfiup pisortaata taama nalunaarutaa upperilluinnarpara nammineerluni oqaatigimmagu. Taamaammat naalakkersuisut siulittaasuat saqqummertariaqalerpoq malitassallu malinneqarnissaat naalakkiutigalugu, Hans Enoksen oqarpoq.
Agguaassinermi ajortoqarsimappat tamanna Naalakkersuisut siulittaasuata maanna nassuiartariaqaraa, Inuit Ataqatigiit siulittaasuata kissaatigaa.
- Inuit Ataqatigiinniit amigaatigaarput naalakkersuisut siulittaasuata uku pisut erseqqissumik oqaaseqarfigissagai. Aamma nassuiaasoqarnissaa kissaatigaarput tassa qanoq pisoqarsimaneranik nassuiaasoqarluni, ajortoqarsimappallu qanoq iliuuseqartoqarnissaa aamma kissaatigaarput, Inuit Ataqatigiit siulittaasuat, Sara Olsvig taama oqarpoq.
Aamma atuaruk IA: Karl-Kristian Krusep imminut sullissimanera ersarippoq
