SIK KNT Aps-imut: Akiliisinnaajunnaaginnaritsi

KNT Aps-imi sulisuusimasut 140.000 koruunit tungaannut akissarsitinneqarsimanngitsut pillugit, KNT qanoq iliuuseqanngippat allatut ajornartormik tunisassiorfik akiliisinnaajunnaartutut nalunaarutigisariaqassaaq. Taama oqarpoq sulisartut kattuffiata, SIK-p siulittaasua, Jess G. Berthelsen.

Allattoq Apollo Jeremiassen, Ivik Kristiansen

oktobarip 28-at 2015 12:24

- KNT oqaloqatigeqqittariaqassavarput aamma ilaasortatta aningaasarsiassami tigunissaat piumasaqaatigissappassuk taava uangut allatut periarfissaarutissaagut KNT Aps-i akiliisinnaajunnaarsissallutigu.

Sulisartut kattuffiata siulittaasua oqarpoq.

KNT Aps-imi sulisut sivisuumik akissarsitinneqarsimannginneri pillugit, SIK-p tunisassiorfik eqqartuussisunut tunniuppaat, neriuutigalugu tassuunaqquullugu akiitsut akilerneqarsinnaassasut. Paasinarsivorli eqqartuussisut aqqutigalugit tamanna pisinnaanngitsoq, suliarlu SIK-mit tunuartinneqarluni.

- Tassa taama qisuariarnitsinnut peqqutigaarput, Mikael Petersenip tusagassiuutit aqqutigalugit ippassaani oqarmat sulisunut akiligassaqaratik aammalu pisussaaffeqaratik, tamanna eqqunngilaq. Uangut uppernarsaatissaqarpugut KNT sulisunut katillugu 140.000 koruunit missaannik akiligassaqartoq, Jess G. Berthelsen oqarpoq.

Aamma atuaruk Mikael: KNT-p pisassinneqarnera inatsisinik unioqqutitsinerunngilaq

KNT Aps-ip sulisut akissarsitinneqarnissaat pisussaaffiginngilaa

KNT Aps-ip pisortaa, Mikael Petersen KNR-imut ataasinngormat ima oqarpoq.

- Tassa KNT-ip akiliisinnaajunnaarallarneranut pissutaavoq, SIK-p upernaaq piumasarimmagu eqqartuussisutigoortumik sulisunut aningaasarsiarititassat KNT-p akilertariaqarai. Kisiannili taakku isumaqatigiinngissutaapput, uangut isumaqaratta sulisut timenik atuineri uangut akilertussaanngikkigut.

Mikael Petersen KNR-imut ataasinngormat taama oqarpoq.

Aamma atuaruk IA: Karl-Kristian Krusep imminut sullissimanera ersarippoq

KNT Aps nutaamik aaqqissuunneqartariaqarpoq

KNT-mi sulisut akissarsitinneqarnissaat pillugu sulisartut kattuffiata, SIK siulittaasua ima siunnersuuteqarpoq.

- Inakkusuppakka suliffeqarfeerannguaq taanna nutaamik aaqqissuuttariaqaraat. Tassa periarfissaavoq namminneerlutik suliffeqarfik akiliisinnaajunnaartissallugu. Taamatullu pisoqarpat taava nutaamik aaqqissuisoqarsinnaavoq. Taavalu akiliisinnaajunnaarnerata kingorna lønmodtagernes garanti fondimiit sulisunut aningaasarsiassaat qinnutigisinnaagatsigit.

Sulisartut katuffiata, SIK-p siulittaasua, Jess G. Berthelsen taama kaammattuteqarpoq.