IA: Karl-Kristian Krusep imminut sullissimanera ersarippoq
Ane Hansen aamma allappoq, aalisarnermut naalakkersuisup, Karl-Kristian Krusep avaleraasartoortassanik qinnuteqartut 49-usut akornanni 15-nit pisassinneqarnissaat pillugu suliani aatsaat naammassimmat, tunisassiorfimmut, KNT Aps-imut attuumassuteqarnini maajip arfineq pingajuanni nalunaarutigimmagu, tamanna isornarluinnartuusoq.
Nunaqarfimmi Niaqornani tunisassiorfik, KNT Aps qinnuteqartut akuerisaasut 15-nik akornanniippoq.
Aamma atuaruk Krusep attuumassuteqartuunini ilisimasimanngilaa
Imminut sullissimaneq ersarilluinnarpoq
Ane Hansen ilaatigut ima allappoq.
- Imminut sullinneq ersarilluinnarpoq, tassami aalisarnermut naalakkersuisup aamma KNT-mi siulersuisuniittup, tunisassiorfimmut piginneqataassutsi ilaquttaminut qanigilluinnakkaminut aatsaat februaarip arfineq pingajuanni tunniuppaa naak avaleraasartuunik pisassinneqarnissani pillugu, januaarip 19-annili qinnuteqareeraluarluni, Ane Hansen allappoq.
Pisumut attuumassuteqartuuneq qangali nalunaarutigineqarsimasariaqaraluarpoq
Kukkunersiuisarfiup Deloittep nalunaarusiaani, aalisarnermut naalakkersuisup taamatullu Naalakkersuisoqarfiup suliap aallartinnginnerani, Karl-Kristian Krusep pisumut attuumassuteqarnera erngerlutik nalunaarutigisimasariaqaraluaraat ilanngullugu allaaseraat.
Tamanna pillugu Ane Hansen ima allappoq.
- Naalakkersuisunngortut piffissaq siulleq pisortaqarfimmiit pisinnaatitaaffinnut qaqugukkullu attuumassuteqarpallaalernermut tunngasut ilanngullugit ilisimatinneqartarput. Taamaammat pisinnaatitaaffiit ilisimannginneri utoqqatsissutissaanngillat, Naalakkersuisullu siulittaasuata pisussaaffini malillugu tamakku atuutsinneqarnissaat maanna naammassisariaqarpaa.
Aamma atuaruk Deloitte: Avaleraasartuunik pisassiissutinik agguaaneq ajunngitsumik ingerlavoq
Aamma atuaruk Karl-Kristian Kruse oqaaseqarusunngilaq
Agguaassisarneq pitsaanerusariaqarpoq
Ane Hansen allappoq aamma kaammattuilluni, pisassat suulluunniit agguaanneqarneranni tatiginartumik tunngaveqarluni agguaassisarneq pissuserissaartumik ingerlanneqartariaqartoq.
Ane Hansen aamma allappoq, avaleraasartuunik qinnuteqartut piumasaqaatinillu naammassinnissimasut itigartitaanerat ersarissumik nassuiarneqarsimanngitsoq itigartitaanermut suut tunngavigineqarsimanersut.
