Politikki Inuussutissarsiutit

Karl-Kristian Kruse oqaaseqarusunngilaq

Aalisarnermut Piniarnermut Nunalerinermullu Naalakkersuisoq Karl-Kristian Kruse, kukkunersiuisarfiup Deloittep avaleraarsaartuunik pisassiissutinik isornartorsiunera pillugu apersoqarususunngilaq.

Allattoq Ane-Marie Petersen, Jonas Løvschall-Wedel

oktobarip 22-at 2015 11:24

Nutserisoq Jaaku Lyberth

Naalakkersuisoq Karl Kristian Kruse piginneqatigiiffimmut KNT-mut avaleraasartoortassiisoqarmat piginneqatigiiffimmut attuumassuteqarpallaarnini nalunaarutigisimasariaqaraluarpaa siusinnerusukkullu qanoq iliuuseqarluni, kukkunersiusarfiup Deloitteip ingerlatsinermik kukkunersiuilluni misissuisitsinerani tamanna qulakkeerlugu oqaatigineqarpoq.

Aamma atuaruk Krusep attuumassuteqartuunini ilisimasimanngilaa

Karl Kristian Krusep piginneqatigiiffimmi KNT-mi piginneqataassutini ernerminut tunniuppaa, taamaaliornikkullu piginneqatigiiffimmut attuumaassuteqarpallaarneranut apeqqut aaqqiivigineqarsorineqarpoq. Taamaaqqissaanngilarli. Deloittemit tikkuarneqarpoq Karl Kristian Krusep attuumassuteqarpallaarnini ilisimagunanngikkaa.

Karl Kristian Krusep suliamut attuumaassuteqarsinnaanini pillugu naalakkersuisoqarfimmini misissorsinnaagaluarlugu annertunerusumik iliuuseqarsimanngilaq, aaqqiissutigineqarsimasorlu pillugu erseqqissumik paasitinneqarani.
Kukkunersiusarfiup misissuisitsinerani allassimavoq, avaleraasartassat agguaanneqarneranni aalisarnermut naalakkersuisup sunniiniarsimaneranik takussutissaqanngitsoq.

Aamma atuaruk Avaleraasartoortassiinermi assigiinngitsumik suleriaaseqarneq GE-p isornartorsiorpaa

Misissuisitsinermi nalunaarusiami aamma atuarneqarsinnaavoq, kukkunersiuisarfimmut Deloittemut ajornakusoorsimasoq, avaleraasartassiissutit agguaanneqarneranni aalisarnermut naalakkersuisoqarfik aamma naalakkersuisup oqaloqatigiissimannginnerannik takussutissaq.
Naalakkersuisup pissutsit tamakkua siusinnerusukkut sooq aaqqiivigisimannginnerai pillugit naalakkersuisoq KNR-mit oqaaseqartinniarneqaraluarpoq.

Uppernarsaatit naammattut sooq pigineqannginnersut, aamma KNT-ip avaleraasartassinneqarnissaminik qinnuteqarnera qanoq ililluni tamanna ilisimasimanngineraa, naak qanigisaasut piginneqatigiiffimmut attuumaassuteqaraluartut.

Aamma atuaruk KNAPK: Arlaannik kinguneqartitsisoqartariaqarpoq

Karl Kristian Kruse KNR-mit attaviginiarneqaraluarpoq tamannali iluatsissinnaasimanngilaq.
Tamanna pillugu Aalisarnermut Piniarnermut Nunalernermullu Naalakkersuisoqarfiup tusagassiuutinut nalunaarut innersuussutigaa, kukkunersiuisarfiup Deloittep ingerlatsinermik kukkunersiuilluni misissuisitsineranik nalunaarusiaq innersuussutigineqarluni.