Politikki Inuussutissarsiutit

KNAPK: Arlaannik kinguneqartitsisoqartariaqarpoq

Naak naalakkersuisup suliami peqataasinnaanani siusinnerusukkut nalunaarutigisimasariaqaraluaraa, avaleraasartoortassanut agguaassineq tamakkiisumik isigalugu ajunngitsumik ingerlasimanerarlugu, Deloittep misissuinermini nalilereeraalu, kinguneqartitsisoqartariaqartoq KNAPK-p siulittaasuata ujartorpaa.

Allattoq Ane-Marie Petersen

oktobarip 21-at 2015 05:22

Qanorli kinguneqartitsisoqassasoq kinalu kinguneqartitsissanersoq KNAPK-p siulittaasuata Henrik Sandgreenip tikkuanngilaa.

- Pisut taama ilungersunartigisut, nunatsinnilu aningaasarsiornerup qiterpiannguani taamatut ingerlatsisoqarnera arlaatungaatigut kinguneqartinneqassanngippat tupinnassaaq, Henrik Sandgreen KNR-imut oqarpoq.

Aamma atuaruk Deloitte: Avaleraasartuunik pisassiissutinik agguaaneq ajunngitsumik ingerlavoq

Aalisarnermut naalakkersuisup piginneqataaffigisimasaa ingerlatseqatigiiffik KNT, aasaq manna avaleraasartoortassinneqarpoq. Tamatumanilu suliaq ajunngitsutut ingerlanneqarsimasoq, kukkunersiuinermik suliffeqarfiup Deloittep nalilerpaa. Taamaattorli Karl-Kristian Krusep piginneqatigiiffimmut arlaatigut attuumassuteqarnini naalakkersuisoqarfimminut siusinnerusukkut nalunaarutigisimassagaa kissaatiginartikkaluarlugu.

Aamma atuaruk Avaleraasartoortassiinerit misissoqqissaarniarneqalerput

KNT tusagassiuutitigut ukiup aallartinnerani oqallisaangaatsiarpoq. Ilaatigut sulisut marluk sivittajaamik aningaasarsitinneqarsimannginneri taavalu akileraartarfimmut milliuunilikkaanik akiitsoqarnera paasinarsimmat.

Kisianni akiitsoqaraluarluni avaleraasartoortassanik 4.000 tons sinnerlugit pisassinneqarnera KNAPK-mit upernaaq eqqumiigineqarpoq.

Aamma atuaruk Avaleraasartoortassat: GFO Aps aamma minitaasimasutut misigisimavoq

- Pissutsinut taama ittunut aamma taama immikkuullaritsigisunik iliuuseqartoqartarnera, nunatsinni anigaasarsiutitut pingaarnersaanni taamatut aqutseriaaseqarneq KNAPK-mit akuersaarsinnaanngilluinnarparput.

Aamma atuaruk Avaleraasartoortassanik agguaassineq Transparencyp oqaaseqarfigaa

Iliuuseqartoqassanersoq KNAPK-p siulittaasuata pissanngatigaa.

- Naalakkersuisooqatigiit matumani taamatut ingerlatsisoqarnera akueriinnassaneraat imaluunniit killeqartissaneraat ulluni tulliuttani assut pissanganassooq, Henrik Sandgreen oqarpoq.

Aamma atuaruk Ukiormanna avaleraasartoortassat kiisami agguaanneqartut