Ukiormanna avaleraasartoortassat kiisami agguaanneqartut
Naalakkersuisunit aalajangiinissamut piumasaqaatigineqartut tunngavigalugit qinnuteqartut ataasiakkaat qinnuteqaataat suliarineqarput, ingerlatseqatigiiffiillu avaleraasartuunik pisassinneqartut aamma ilisimatinneqarput pisassiissutigineqartut pisassiissutaagallarmata, pisassiissutigineqartut tamakkerneqanngippata nutaamik pisissiisoqarsinnaalluni. Avaleraasartuut pisassiissutigineqartut tamakkerneqarnissaat tamatumani anguniarneqarmat.
Nunatsinni aalisarnerup iluani ingerlatseqatigiiffissuit marluk - Polar Seafood gruppen aamma Royal Greenland Pelagic - ingerlatseqatigiiffinnut namminneerlutik aalisariutilinnut piassiissutigineqartunit 55.000 tonsiusunit tamarmik immikkut 12.000 tonsinik pisassinneqarput.
AAMMA ATUARUK Avaleraasartoortassanik qinnuteqaatit suliarineqarneri sakkortuumik isornartorsiorneqartut
Aammattaaq pisassiissutinit taakkunannga, Arctic Prime Fisheries 8.000 tonsinik pisassinneqarpoq, ingerlatseqatigiiffiillu allat tallimat 4.000 tonsinik 6.000 tonsinillu pisassinneqarlutik.
Ingerlatseqatigiiffinnut namminneerlutik aalisariuteqanngitsunut, ingerlatseqatigiiffiit arfineq-marluk, pisassiissutigineqartunit 30.000 tonsiusunit, assigiimmik pisassinneqarput, tamarmik immikkut 4.285 tonsinik pisassinneqarlutik.
AAMMA ATUARUK Avaleraasartoortassiinermi kalaallit salliutinneqartut
Kiisalu Kitaani avaleraasartoortassiissutigineqarput 5.000 tonsit, taakkulu sinerissap qanittuani aalisarnermut immikkoortinneqarsimapput. Kitaata sineriaata qanittuani aalisarsinnaanermut akuersissutaatillit avaleraasartuunik misileraanissamut akuersissummik pisinnaapput.
