Avaleraasartoortassiinermi kalaallit salliutinneqartut
Avaleraasartoortassat katillutik 85.000 tonsiupput, taakkunannga 55.000 tonsit ingerlatsivinnut aalisariutinik nunatsinneersunik pigisalinnut pisassiissutigineqassapput.
Ingerlatsiviit namminneerlutik aalisariutaatillit Naalakkersuisunit salliutinneqarput, ukiorlu ilivitsoq inuttaqartitsisinnaanissaminnut qulakkeerinnissimasut aamma salliutinneqarlutik.
Avaleraasartoortassat sinneri 30.000 tonsit ingerlatseqatigiiffinnut najukkani ingerlanneqartunut aamma/imaluunniit ingerlatseqatigiiffinnut ikerinnarsiorluni aalisarnermik innuttanut kalaallinut ilinniartitsisimanerminnik uppernarsaasinnaasunut pisassanngortinneqassapput.
Kalaallit aalisariutaasa salliutinneqarlutillu naammattunik pisassinneqarnissaat Naalakkersuisut pingaartippaat. Kalaallit ikerinnarsiortunik aalisariutaasa ineriartortinneqarneri sukkanerusumik ingerlanneqarsinnaanissaa, kalaallillu inuttat avaleraasartoorniarnermik sukkanerusumik misilittagaqalersinnaanissaat taamaaliornikkut qulakkeerniarneqarpoq.
Ingerlatseqatigiiffiit kalaallit aalisariutaannik piginnittuusut ikaarsaariarnermi aalisariutinik nunanit allaneersunik attartorsinnaanissamut periarfissinneqarnissaat Naalakkersuisunit ilutigalugu pingaartinneqarpoq.
- Taamaaliornikkut siunissaq isigalugu kalaallit aalisariutinik nutaanik assigisaanillu aningaasaliissutissanut annertuunut akissaqarnerulernissaat qulakkeerneqassaaq, Aalisarnermut, Piniarnermut Nunalerinermullu Naalakkersuisoqarfik tusagassiuutinut nalunaarummi ilaatigut taama allaaserisaqarpoq.
2014-imi avaleraasartoorniarnermi tamakkiisumik aalisarneqarsinnaasunit 78.670 tonsiusunit 31.584 tonsit aalisariutinit nunatsinneersunit pisarineqarput, aalisariutillu nunatsinneersut siornamut naleqqiullugu ukioq manna amerlanerusunik pisaqarsinnaanissaat naatsorsuutigineqarpoq.
