Avaleraasartoortassat: GFO Aps aamma minitaasimasutut misigisimavoq
Sakkortuumik isornartorsiuisut siulliit tassaallutik, NUSUKA aamma KNAPK. Taakku isumaqarput avaleraasartoortassanik agguaassineq pissusissamisoorsimanngitsoq oqarlutik, piginneqatigiiffissuit soorlu Greenland Pelagic A/S taanna Royal Greenlandimit, Polar Seafoodimit aamma tuluit piginneqatigiiffissuannit J. Marr Seafoodimit pigineqartumut sanilliullugit nunaqavissut tunulliunneqarsimasut.
NUSUKA aamma KNAPK isumaqarput, nunaqavissut tunulliunneqartarneri allanngortinneqartariaqartoq taamaaliornikkut taakku avaleraasartoorniarnermut peqataanerulernissaat anguniarneqartariaqartoq oqarlutik.
AAMMA ATUARUK Aalisarnermut naalakkersuisoqarfik: Inatsit naapertorlugu avaleraasartuunik agguaassisoqarpoq
Piginneqatigiiffik alla nunaqavissunit aalisartunit piniartunillu annertunerusumik pigineqartoq, Greenland Fish and Offshore Aps, avaleraasartoortassanik 6.000 tonsinik siorna tunineqartoq ukioq manna avaleraasartoortassanik agguaassinermi aamma mininneqarpoq.
Piginneqatigiiffik taanna ilaatigut Tuluit piginneqatigiiffissuannit J. Marr Seafoodimit aningaasaliiffigineqartoq, Namminersorlutik Oqartussat piumasaqaataannik naammassinnissimasoq piginneqatigiiffiup pisortaa, Svend Erik Sønderstrup KNR-imut oqarpoq.
- Nunaqavissut avaleraasartoorniarnermut qinnuteqarsinnaanerannut piumasaqaataavoq, piginneqatigiiffik nunaqavissunit annertunerusumik pigineqarnissaa, tamannalu piumasaqaat uangut naammassivarput, tassami J. Marr Seafoodip piginneqataassusaat pingajorarterutaanngilarluunniit, Svend Erik Sønderstrup oqarpoq imalu nangilluni.
- Ukioq manna averaasartoorniarnissatsinnut itigartitaanerput piginneqataasunut kalaallinut aalisartunut piniartunullu ajortumik kinguneqassaaq, naak Tunumi aalisarnerup inerisarneqarnissa siunertaralugu, Tasiilami aalisakkerivimmik ilaatigut pilersitsisoqarnissaa maanna sulissutigalugu aallartereeraluarlutigu, Greenland Fish and Offshore Aps-ip pisortaa, Svend Erik Sønderstrup oqarpoq.
AAMMA ATUARUK Ukiormanna avaleraasartoortassat kiisami agguaanneqartut
Aalisarnermut, Piniarnermut Nunalerinermullu Naalakkersuisoqarfimmi pisortap, Jørgen Isak Olsenip tusagassiuutinut marlunngormat juunip aappaanni nassiussamini allappoq, averaasartuunik pisassiinerit tamarmik kinaassusersiorani aamma inatsisit naapertorlugit pisassiisoqarmat isornartorsiuinerit pissusissamisoortuunngitsut.
Naqqiut
Ilanngutassiaq sisamanngormat juunip sisamaanni saqqummiunneqarmat KNR-imit allappugut, Royal Greenland A/S Greenland Fish and Offshore-mut piginneqataasoq. Tamanna eqqunngilaq tassa Royal Greenland A/S GFO-mut piginneqataanngilaq. Kukkunerput ajuusaarutigaarput.
