Deloitte: Avaleraasartuunik pisassiissutinik agguaaneq ajunngitsumik ingerlavoq
Naalakkersuisut avaleraarsartoortassanik upernaaq agguaassinerat soqutigisalinnit oqallitsitsivoq sakkortuumillu isornartorsiorneqarluni.
Aalisarnermut naalakkersuisup Karl-Kristian Krusep piginneqataaffigisimasaa Kalaallit Nunaanni Tunisassiorfik, KNT, avaleraasartuunik 4285 tonsinik pisassinneqarmera isornartorsiorneqarpoq.
Aamma atuaruk Avaleraasartoortassiinerit misissoqqissaarniarneqalerput
Aalisarnermut naalakkersuisoq Karl-Kristian Kruse attuumassuteqarnera peqqutaalluni, avaleraasartuunik pisassanik agguaassinissap suliarineqarnerani peqataasinnaanngitsutut, Aalisarnermut naalakkersuisoqarfiup siusinnerusukkut naliliersimasussaagaluaraa, kukkunersiuisarfiup Deloittep aamma isornartorsiorpaa.
Naalakkersuisoq suliaqaqataasinnaanngilaq
Naalakkersuisup suliamik suliaqaqataasinaannginneranik kingusissukkut aatsaat nassuerutiginnissimanertik, Aalisarnermut naalakkersuisoqarfiup pisortaata nassuiaatissaqartippaa.
- Ukioq aallartinngitsorli qinnuteqaatit ilai takkupput. Iserneriniit sunngiivillugit suliassanut inissiinnarpagut, Naalakkersuisut suli aalianginngimmata agguaassineq qanoq ingerlatissaneripput, Aalisarnermik Piniarnermut Nunalerinermullu Naalakkersuisoqarfimmi pisortaq Jørgen Isak Olsen oqarpoq.
Aalisarnermut naalakkersuisup Karl-Kristian Krusep naalakkersuisunngunngikkallarami piginneqataaffigisaa, ingerlatseqatigiiffik KNT avaleraasartuunik 4285 tonsinik pisassinneqarpoq.
Tamanna aalisarnermik soqutigisalinnit allanit isornartorsiorneqarpoq.
Kingusissukkut paasinarsivoq
Kisianni aalisarnermut naalakkersuisup soqutigisaqarfigisimasaa, KNT, qinnuetqertunut akuusoq, naalakkersuisoqarfiup piffissakkut kingusissukkut paasisimagaa, naalakkersuisoqarfiup pisortaata oqaatigaa.
- Aatsaat paasisinnaavarput suliap ingerlanneqarsinnaalernerani. Killissarititaasoq qaangiuppoq maajip arfernani taassuma kingorna aatsaat kikkut naalakkersuisut aaliangingaanni tunngavissami aalisarnermut peqataatinneqarsinnanersut. Taakkununngalu KNT ilaasimavoq, Jørgen Isak Olsen oqarpoq.
Aamma atuaruk Krusep attuumassuteqartuunini ilisimasimanngilaa
Aalisarnermut, piniarnermut nunalerinermullu naalakkersuisoq Karl-Kristian Kruse oqaaseqartinniaraluarparput, naalakkersuisoqarfimmiilli tusagassiutinut nalunarumminni naalakkersuisuisup oqaaseqaataanut innersuussivoq:
- Soorunalimi nuannaarutigaara nalunaarusiap inernerani piginneqatigiiffimmut attuumassuteqarsimanera pillugu, namminerlu naliliinera eqqorsorinninneralu naapertorlugu issuarneqarmat. Nalunaaruteqarpunga piffissami pineqartumi suliamut attuumassuteqarlunga. Uanga naalakkersuisoqarfillu KNT ApS qinnuteqartut ilagigaat paasigatsigu, Aalisarnermut naalakkersuisoq tusagassiutinut nalunaarummut taama allappoq.
Aamma atuaruk Avaleraasartoortassanik pisassiinerup misissuiffigineqarnissaata naammassineqarnissaa KNAPK-mit qilanaarineqarpoq
