Avaleraasartoortassanik pisassiinerup misissuiffigineqarnissaata naammassineqarnissaa KNAPK-mit qilanaarineqarpoq

- KNAPK-mit nuannaarutigaarput misissuisoqartussanngormat. Kisianni eqqumiigaarput, politikkikkut aalajangerneq, teknikkikkut aalajangiisimanermut tunngatillugu misissuinissami namminneq toqqakkaminnik, sulisitaminnik akilikkaminnillu sulisitsinerat, Petrus Biilmann oqarpoq.

KNAPK-p pisortaa aamma oqarpoq misissuisitsinissaq KNAPK-p ilaasortaannut kingunerlutsitsisinnaasoq.

- KNAPK-p ilaasortaannut tunniussinerup naammagittaalliutigineqartumullu, uangullu tamanna kukkunertut isumaqarfigisatsinnut aamma aalajangiinerit kukkusut arlaliusut eqqarsaatigalugit, ilaasortatta amerlanersaasa aalisariaatsimut nutaamut isernissaraluannut tamanna pinngitsoortitsisinnaavoq.

KNAPK-p pisortaa, Petrus Biilmann oqarpoq.

Pisassiissutit pillugit misissuisitsineq ukiaru septembarimi naammassineqartussatut aalajangiunneqarpoq.

Pisassiissutinik misissuisussat arlaannaannulluunniit attuumassuteqanngitsut, Aalisarneq pillugu Naalakkersuisoqarfimmi pisortaq, Jørgen Isak Olsen oqarpoq.

Isornartorsiuinerit aallaavigalugit misissuisoqarnissaa piumasarineqarpoq

Pisassiissutinik ukioq manna agguaassinermi isornartorsiutit arlariinnit pisut toqqammavigalugit, Aalisarneq pillugu Naalakkersuisoqarfimmi pisortaq, Jørgen Isak Olsen misissuisoqarnissaanik piumasaqarpoq. Taanna aamma nassuiaavoq, pisassiissutinik agguaassinermi Naalakkersuisoqarfimmit malittarisassat malinneqarsimaneri uppernarsarneqassammata misissuisitsisimalluni.