Krusep attuumassuteqartuunini ilisimasimanngilaa

Avaleraasartuunik pisassiissutissat ukiup massuma aallartinnerani agguaanneqarmata aalisarnermut naalakkersuisup, Karl-Kristian Krusep tamassumunnga attuumassuteqarpallaarnini erngerluni saqqummiuttariaqarsimagaluarpaa. Taama kukkunersiuisut allapput.
Assi © : Nauja Møller/KNR
oktobarip 19-at 2015 06:43

Avaleraasartuunik pisassiissutissat ukiup massuma aallartinnerani agguaanneqarmata, aalisarnermut naalakkersuisup, Karl-Kristian Krusep, tamassumunnga attuumassuteqarpallaarnini erngerluni saqqummiuttariaqarsimagaluarpaa.

Avileraasartuut agguanneqareerneranni tamassuma misissorneqareernerani taama naliliivoq kukkunersiuisarfik Deloitte.

 

Suliaq pillugu Kruse sunniiniarsimanngilaq

Taakku nalunaarusiaminni allapput, agguaassinerit pileruttormata, Karl-Kristian Krusep tamassumunnga attuumassuteqarpallaarnerini pillugu suliamut sunniiniarsimanngitsoq.

Aamma Naalakkersuisoqarfimmit qinnuteqaat tiguneqareersorlu taakku qisuariarsimasussaagaluartut nalunaarusimani allassimavoq.

Nalunaarusiamissaaq allaaserineqarpoq, avaleraasartuunik pisassiissutit agguaatinngitsiarneranni, Karl-Kristian Kruse suliffeqarfiup KNT Aps-ip siulersuisuunerinit siulittaasutut tunuartoq. Aamma allaaserineqarluni suliffeqarfimmi piginneqataanini tuniniarsimagaluaraa iluatsinngimmalli tamanna ernerminut tunniussimagaa allaaserineqarluni.

Karl-Kristian Krusep taama iliorsimanera Naalakkersuisoqarfimmit eqqortutut oqaatigineqarpoq aamma oqarlutik iluamik siunertaqarluni taama iliorsimasoq, taamaalillunilu suliamut attuumassuteqarpallaarnini atorunnaarsissimagaa, aalisarnermut naalakkersuisoqarfik isumaqarluni.

 

Krusep imaluunniit Naalakkersuisoqarfiup ilisimasussaagaluarpaa

Nalunaarusiamili allaaserineqarpoq, naalakkersuisup suliamut attuumassuteqarnera eqqarsatigalugu tamanna naammanngitsoq.

- Naalakkersuisup suliffeqarfimmik piginneqataanera taamatullu qanigisaata piginneqataaginnarnera eqqarsaatigalugu tamanna Naalakkersuisup nammineerluni Naalakkersuisoqarfiulluunniit qanoq iliuuseqarfigisimassagaluarpaat, Deloitte allappoq.

Aalisarnermut Naalakkersuisup suliamut attuumassuteqarnera paasineqarpoq maajip arfineq pingajuanni, tassa avaleraasartuunik pisassiissutit agguaanneqarnerisa ullut marluk qaangiutereersoq.

 

Krusep suliamut attuumassuteqartuunini ilisimasimanngilaa

Suliamulli Naalakkersuisup attuumassuteqarnini aatsaat maajip 14-anni tamanut tusarliuppaa.

- Suliffeqarfiup KNT Aps-ip qinnuteqarnera paasigatsigu uanga suliamut tamassumunnga attuumassuteqartuunera nalunaarutigaara, Karl-Kristian Kruse paasissutissiivoq oqarlunili KNT Aps-ip qinnuteqarsimaneranik ilisimasaqarsimanani.

Deloitte-p nalunaarusiaminni aamma allapput, avaleraasartuunik pisassanik agguaassinermi, suliffeqarfiit oqartussanut aningaasanik akiitsoqarneri eqqarsaatigineqarneq ajormat naak allatigut tamanna nalilersorneqartaraluartoq.