Avaleraasartoortassiinerit misissoqqissaarniarneqalerput
Tusagassiuutinut naatsumik nalunaaruteqarnermi, Namminersorlutik Oqartussat allapput, Aalisarnermut, Piniarnermut Nunalerinermullu Naalakkersuisoqarfik nammineq suliniuteqarnermigut, avaleraasartoorniarnissamut qinnuteqaatini allaffissornikkut ingerlatsineq pillugu misissuisoqarnissaanik aalajangiisimasoq.
Avaleraasartoorniarnissamut agguaassinerit arlalinnit isornartorsiorneqarnerat aamma allaffissornermi sinaakkutaasimasut aallaavigineqarsimasullu siunissami eqqortumik aallaavigineqartarnissaat taama aalajangernermut pissutaatinneqarpoq.
Aamma atuaruk Avaleraasartoortassanik qinnuteqaatit suliarineqarneri sakkortuumik isornartorsiorneqartut
Naalakkersuisoqarfimmit inatsisit atuutsinneqartut aamma pisortat allaffeqarfiini ingerlatsisimaneq eqqortoq, periusaarsorlu malinneqarsimanersut misissuisussat qulakkiissavaat.
Misissuisitsineq ukiaru septembarip qiteqqunnerani naammassereersimasussatut naatsorsuutigineqarpoq.
Misissuinermi nalunaarusiaq Inatsisartut Kukkunersiuinermut Ataatsimiititaliaanut aamma Inatsisartut Aalisarnermut, Piniarnermut Nunalerinermullu Ataatsimiititaliaanut ilisimatitsissutitut nassiunneqarumaartoq, Namminersorlutik Oqartussat tusagassiuutinut nalunaarumminni allapput.
Aamma atuaruk Avaleraasartoortassiissutigineqartut pillugit akissutissanik Aalisarnermut ataatsimiititaliaq ujartuisoq
Aamma atuaruk Ukiormanna avaleraasartoortassat kiisami agguaanneqartut
