VIDEO Mikael: KNT-p pisassinneqarnera inatsisinik unioqqutitsinerunngilaq
Tamassuma saniatigut tunisassiorfimmi sulisut marluk qaammatini arlalinni akissarsitinneqarsimannginnertik pillugu sulisartut kattuffiat SIK aqqutigalugu, KNT Aps eqqartuussisunut tunniuppaat. Tamannalu pillugu tunisassiorfik akilersuinerminik unitsitsilluni.
Tamanna uppernarsarneqarpoq, KNT Aps-ip pisortaanit Mikael Petersenimit.
- KNT taamanili akilersuinerminik unitsitsivoq. Aatsaallu SIK-p eqqartuussisulersuussinini qanittukkut unitsiinnarmagu KNT nammineerluni maanna qanoq iliuuseqaqqinnissaminut periarfissaqalerpoq, pisortaq Mikael Petersen oqarpoq.
Aamma atuaruk KNT-p akilisinnaajunnaarallarnera taamaatinneqarpoq
Tunisassiorfiup ingerlaqqinnissaa nalorneqartoqarpoq
KNT-p ukiumut naatsorsuutaasa 2013-imut 2014-imullu tunngasut takutippaat, tunisassiorfik nammineq aningaasaataat minus 1,9 millioner koruuniusut soorluttaaq tunisassiorfik katillugit 4,6 millioner koruuninik akiitsoqartoq taakkunannga 1,2 millioner koruunit Akileraartarnermut Aqutsisoqarfimmut akiitsuullutik.
Tunisassiorfiup aningaasaqarniarnera eqqarsaatigalugu, attuumassuteqanngitsumik kukkunersiuisut, Grønlands Revisionskontoret naliliivoq, issuaaneq aallartippoq: "- tunisassiorfiup ingerlaqqinnissaa nalorninartoqartoq", issuaaneq naavoq.
Akiliisinnaajunnaaraluartut avaleraasartoortassinneqarput
Naak suliffeqarfittut tunisassiorfiup ingerlanneqarnera apeqquserneqaraluartoq, 2015-imut avaleraasartoortassat katillugit 85.000 tonsiusut, Naalakkersuisunit agguaassassatut aalajangerneqarmata, KNT Aps qinnuteqarpoq. Maajillu 21-anni, tassa akilersuinermik unitsitsineq qaammatit marluk qaangiutereersut, Naalakkersuisunit nalunaarfigineqarput avaleraasartuunik 4.285 tonsinik tunineqartut.
Avaleraasartuulli KNT Aps-imut pisassiissutigineqartut aalisarneqanngillat, taamaattumillu tunisassiorfimmut iluanaarutaanatik annaaneqaannarlutilli.
Tamanna pillugu Mikael Petersen KNR-imut ima oqarpoq.
- Avaleraasartuut akii apeqqutaallutik ilimagaara, 5 millioner koruunit tungaanut KNT-p pissarsiarisimasinnaagaluarai, Mikael Petersen oqarpoq.
Aamma atuaruk IA: Karl-Kristian Krusep imminut sullissimanera ersarippoq
IA: Nassuiaatitaqanngitsumik tunineqarput
Inatsisartuni partiip illuatungiliuttup, Inuit Ataqatigiit sinnerlugit, Ane Hansenip KNT Aps-ip avaleraasartuunik pisassinneqarsimanera pillugu isornartorsiuteqarnermini taava, qinnuteqartut 49-t akornanni 15-iusut ilaat ataaseq qinnuteqartoq tunineqarsimasoq nassuiaatitaqanngitsumik.
Mikael Petersen KNR-imit aperaarput Siumumi allattaanertut atorfeqarnini pillugu avaleraasartoortassanik 4,285 tonsinik tunineqarsimanersoq, taannalu ima akivoq.
Mikael: Inatsisinik unioqqutitsisoqanngilaq
- Naamerluinnaq aamma taamaattoqarsinnaanngilluinnapoq. Tassa soorunami inatsisinik tunngaveqartunik pisassiisoqartarpoq avaleraasartuunuinnaanngitsut aammali aalisakkanik allanik pisassiinermut, taamaattumik uangut agguaassinermi attorneqarsinnaanngilluinnapugut.
KNT Aps-ip pisortaa, Mikael Petersen taama oqarpoq.
