Avaleraasartoortassanik agguaassinermi sinaakkutissat Krusep siuttuuffigai
Avaleraaasartuunik pisassiinermi piumasaqaataasut KNT Aps-imit naammassineqarput agguaassinerlu maleruagassat toqqammavigalugit pisimasoq, kukkunersiuisut Deloitte-kkut nalunaarusiaanni atuarneqarsinnaavoq.
Pisassanik agguaassilernermi aalisarnermut naalakkersuisoq, Karl-Kristian Kruse tamanut nalunaaruteqarpoq, qinnuteqartut ilaannut, KNT-mut attuumassuteqarnini pillugu agguaassinermut peqataasinnaanani.
Agguaassinissamulli piumasaqaataasut malinneqaraluartut, taamaattoq aalisarnermut naalakkersuisup KNT-imut attuumassuteqarnera pillugu taanna isornartorsiorneqarpoq annertuumik ilaatigut tunisassiorfiup akileraarutinut akiitsui eqqarsaatigalugit.
Aamma atuaruk Illuatungiliuttut: Imminut sullinneq naalakkersuisooqatigiinnit tunuliaqutserneqarpoq
Aamma atuaruk SIK KNT Aps-imut: Akiliisinnaajunnaaginnaritsi
Aalisarnermut naalakkersuisoq siuttuuvoq
Maannali paasinarsivoq Karl-Kristian Kruse agguaassinermut piumasaqaataasussat suliarineqarnerani sunniuteqarluarsimasoq.
Tamanna pillugu aalisarnermut naalakkersuisoqarfimmi pisortaq, Jørgen Isak Olsen ima oqarpoq.
- Soorunalimi aalisarnermut naalakkersuisuugami aalisarnermut sinaakkutissanik saqqummiinerni taanna sqqummiisussaavoq.
- Tassa imaappa avaleraasartuunik pisassiinissammi suut piumasaqaataanersut suliarereerlugit Naalakkersuisoqatiminut saqqummiussai Naalakkersuisunit akuerineqartut?
- Aappi tassa taamaappoq, Jørgen Isak Olsen oqarpoq.
Aningaasanik akiitsoqartut oqartussanit suliakkerneqarneq ajorput
Oqartussanit iloqquuvoq soorlu sanaartortitsiniarnerni sanaartortussat oqartussanut aningaasatigut akiitsoqannginnissaat piumasarineqartarluni.
Avaleraasartuunilli agguaassinermi tamanna piumasaqaataanngilaq. Tamanna pillugu aalisarnermut naalakkersuisoqarfimmi pisortaq, Jørgen Isak Olsen ima oqarpoq.
- Maannakkut periusitsini suliat aningaasaqarnermut tunngasut misissornissaannut periarfissaqarsimanngilagut aamma taakku sulinitsinni tunngaviusarsimanngillat. Sulinitsinnili tunngaviusartut tassaapput, Naalakkersuisut aalajangigaat, tassa kikkut agguaassinermi tunngaviussappat aamma suut tunngaviussappat, tassa taakkuupput Naalakkersuisut aajangigaat.
Jørgen Isak Olsen oqarpoq uppernarsarlugulu nunaqarfimmi Niaqornani tunisassiorfik KNT Aps, ilaatigut Karl-Kristian Krusemit, Mikael Petersenimit allanillu katillugit 66-nik piginneqataaffigineqartoq pisassinneqarsimasoq, tassa piumasaqaataasup aappaa malillugu tassaasoq, tunisassiorfik suliffeqarfilluunniit ikinnerpaanik 20-nik piginneqataassutigineqarpat taakku tunineqarsinnaasut.
- Agguaassinissamut tunngavigineqartut aappaanni piginneqataasut qassiunissaat aallaaviuvoq. Tassa sinerissamut qanittumi aalisarsinnaanermut akuersissutillit sapinngisamik amerlanerpaat tunuliaqutaappata agguaassinissamut ilaatinneqassasut. Tassanilu KNT Aps ilaavoq. Jørgen Isak Olsen oqarpoq.
Aamma atuaruk Mikael: KNT-p pisassinneqarnera inatsisinik unioqqutitsinerunngilaq
Maleruagassat allanngortinneqarnissaat suliarineqalerpoq
Aalisarnermut naalakkersuisoqarfimmi pisortaq, Jørgen Isak Olsen aamma oqarpoq, kukkunersiuisartut Deloitte-kkut avaleraasartuunik pisassiineq pillugu nalunaarusiaat aallaavigalugu, pissutsit aaqqinneqarnissaat aamma pisassiisoqartillugu maleruagassat allanngortinneqarnissaat, aalisarnermut naalakkersuisoqarfimmit suliarineqaleruttortut.
