Illuatungiliuttut: Imminut sullinneq naalakkersuisooqatigiinnit tunuliaqutserneqarpoq
- Imminut sullinneq, inuiaqatigiillu pisuussutaannik aammalu pisassiinermik atornerluilluni naalakkersueriaaseqarneq massakkut naalakkersuisooqatigiinnit tunuliaqutserneqarpoq.
Inatsisartuni illuatungiliuttut Inuit Ataqatigiit aamma Partii Naleraq ataatsimoorussaminnik tusagassiuutinut ullumi nalunaarumminni allaput, naalakkersuisooqatigiinnit tunisassiorfik, KNT Aps ikiorserneqarsimasoq akuersaarneqarsinnaanngitsoq aamma allallutik.
KNT 40 millioner koruuninik iluanaarsimasinnaagaluarpoq
Inatsisartuni illuatungiliuttut allapput, KNT Aps-ip avaleraasartuunik 4,285 tonsinik pisassinneqarnerminni, taakkulu tunineqarsimasuuppata tunisassiorfik, 40 millioner koruunit uniorujussuarnagit kaaviiaartitsilersimassagaluartoq.
KNT Aps-illu pisassinneqarnissaa pillugu, Siumup allattaanera Mikael Petersen, Aalisarnermut Naalakkersuisoqarfimmut toqqaannartumik allagaqarsimasoq, avaleraasartuunik qinnuteqarnertik pillugu nukigisaaraluni, Inatsisartuni illuatungiliuttut Inuit Ataqatigiit Partii Nalerarlu tusagassiuutinut nalunaarumminni allaput aamma oqarlutik, Mikael Petersenip allakkamini, KNT Aps-ip aningaasaqarniarnikkut pisariaqartitai nassuiarsimagai.
Naalakkersuisut ikiorsiisarput
Inatsisartunilu illuatungiliuttut aamma allapput, KNT Aps-ip ingerlalluarnissaa tapersersugarigamikku kisiannili suliffeqarfiit KNT-tut ittut ajutuulerneranni, Naalakkersuisunit immikkut tamakku ikiorserneqartarneri naliginnaasuunerarpaat.
- Imminut sullinneq, inuiaqatigiillu pisuussutaannik aammalu pisassiinermik atornerluilluni naalakkersueriaaseqarneq massakkut naalakkersuisooqatigiit tunuliaqutserneqarpoq, Inuit Ataqatigiit Partii Nalerarlu allapput.
Aamma atuaruk IA: Karl-Kristian Krusep imminut sullissimanera ersarippoq
Aamma atuaruk KNT qalerallit pillugit isumaqatigiissut atorunnaarsikkusuppaa
Taakku aamma apeqqusiipput Demokraatit, Atassutip aamma Siumup Inatsisartuni ilaaasortaatitaannit tamanna sooq tapersersorneraat.
- Sooq naalakkersuinikkut torinngitsuliornerit pinngitsoortissallugit nukissaqarfigineqanngillat? Imaappa siuttunit naqisimaneqarneq namminerlu Inatsisartunut ilaasortatut isummersinnaassutsikkut nukissaqannginneq pissutaanerpat? Nassuiaasoqarli sooq aamma suut tunngavigalugit naalakkersuisuutitasi atorfilittasilu imminnut iluaqusersorlutik imminnullu, isaasalerlugu ”annanniarlutik” sulinerat tapersersorissi?
Illutungiliuttut allapput imalu naggasiillutik.
- Naalakkersuisooqatigiinnut isertuuseqataanasi massakkut piaartumik isummerfiginiarsiuk! Inuiaqatigiit aallartinngilaasi pisut taamaattut isertuuteqqullugit piumaffigalusi. Akuersaarsimanngikkussiuk kinguneqartitsinissarsi periarfissatuaavoq!
Inatsisartuni illuatungiliuttut Inuit Ataqatigiit Partii Nalerarlu tusagassiuutinut nalunaarumminni allaput.
