KNT qalerallit pillugit isumaqatigiissut atorunnaarsikkusuppaa
Tunisassiorfik KNT Aps aamma Royal Greenland A/S, ukiunut qulinut atuuttumik isumaqatigiissuteqarput, KNT Aps-ip qalerannik tunisassiai taamaallaat Royal Greenlandimut tunineqartassasut.
Tunisassiorfiorfilli imminut akilersinnaasumik ingerlanneqarnera siunissami iluatsissappat, Royal Greenlandimut pituttuisumik isumaqatigiissut tamanna peerneqartariaqartoq, tunisassiorfiup KNT Aps-ip pisortaa, Mikael Petersen oqarpoq.
- Taamatut piumasaqarnerup kinguneraa, KNT-p isertitassaraluisa affaannanngorneri. Uanga taama naliisarpunga, tassa assersuutigalugu qaleralik avammut tunineqaraagat taanna kiilumut 50 koruunit sinnerlugit akeqartarpoq. KNT-milli Royal Greenlandimut akigititarput taamaallaat killumut 26 koruuninik akilerneqartarpoq. Akit taakku qanoq nikingatigisut kialluunniit takusinnaavai.
Aamma atuaruk KNT-p akilisinnaajunnaarallarnera taamaatinneqarpoq
Mikael Petersen oqarpoq imalu nangilluni oqarluni.
- Taamaattumik pituttuisumik isumaqatigiissuteqarneq atorunnaarsinneqanngippat immunut akileriartuaartumik ingerlatsineq arriitsuaranngussaaq, Mikael Petersen naqissusiivoq.
KNT Aps-ip Royal Greenlandillu pituttuisumik isumaqatigiissut atsiorpaat ukiut tallimat matuma siorna, tassalu ukiut tallimat maannamiit tamanna suli atuuttussaassalluni.
Oqartussat aalajangiisariaqarput
KNT kisimi pituttuisumik Royal Greenlandimut isumaqatigiissuteqanngitsoq, Mikael Petersen oqarpoq. Siunnersuutigalugulu Royal Greenlandip taama isumaqatigiissusiortarnera oqartussanit atorunnaarsinneqartariaqartoq.
- Tamanna atorunnaarsinneqartuuppat, naligiittut nunarsuarmi akit tunngavigalugit ingerlatsinerup imminut akilersinnaasunngoriartornera sukkanerujussuarmik anguneqarsinnaalissagaluarpoq.
Aamma atuaruk KNT-amigaartooqqammat Kitaa Seafood utaqqimaarpoq
KNT Aps-ip pisortaa oqarpoq imalu nangilluni.
- Nunaqarfimmi Niaqornani tunisassiorfeerannguaq ukiumut 3 millionit 4 milluionit koruunillu akornanni kaaviiaartitaqartoq imminut sukkanerusumik akilersinnaasunngortinneqassappat taava Royal Greenlandip pituttuisumik isumaqatigiissuteqarnera peerneqartariaqarpoq. Tamannalu tassa anguniartuaraluarparput aallaqqaataaniilli ullorli manna tikillugu suli angunatigu.
KNT Aps-ip pisortaa, Mikael Petersen taama oqarpoq.
Aamma atuaruk KNT-ip qinnuteqarsimanera GE-p ajoraa
Isumaqatigiissutip allanngortinneqarnissaa KNT-mit piumasarineqarsinnaavoq
Royal Greenlandip tunisassiornermut pisortaa, Lars Nielsen KNR-imut oqarpoq, Royal Greenlandip KNT Aps-imut isumaqatigiissutaa pillugu oqaaseqarsinnaanani. Aamma isumaqatigiissutip atorunnaarsinneqarnissaa KNT Aps-imit piumasarineqarpat tamanna KNT Aps-ip saaffiginninneratigut tamanna oqaloqatigiissutigineqarsinnasoq oqarluni.
