KNT-ip qinnuteqarsimanera GE-p ajoraa
Tamannalu ajorluinnarpoq, Kalaallit Nunaanni sulisitsisut peqatigiiffianni, GE-mi pisortaq, Brian Buus Pedersen oqarpoq.
Taanna aamma oqarpoq, avaleraasartoorniarneq misileraanertut ingerlanneqartoq eqqarsaatigalugu, tunisassiorfiit pinngitsooratik tulaassisarnissaminnik qulakkeerinninngippata tamanna arlalitsigut ajortumik sunniuteqarsinnaasoq.
- Siullermik, Nunatta karsia avaleraasartuut akitsuuserneqarnerannit annaasaqassaaq. Aappaattullu, Nunatta imartaanni ilumut avaleraasartooqarneranik uppernarsaateqartoqannginneranik tamanna takussutissiiginnassaaq. Taamaalippallu nunarsuatsinni avaleraasartoortassat agguaanneqalerpata, Nunatta isumaqatigiinniarnissamut inissisimanera soorunami ajornerulersussaassaaq. Tamannaannarlunniit eqqarsaatigalugu, ajorluinnarpoq tunisassiorfiit aalisarnermut peqataasinnaanngitsulluunniit pisassittarneqarneri.
Brian Buus Pedersen oqarpoq neqissuseqqillugulu oqarluni, misileraanermik aalisarneq tassaammat, Nunatta imartaani siunissami avaleraasartooqarneranik uppernarsaatinik katersinissaq.
Avaleraasartuut takkusimanngikkallarput
Naak Nunatta sineriaani ukioq manna avaleraasartuut naatsorsuutigisamik takkusimannginneri pissutigalugu pisassat tamakkerneqanngikkaluartut, tunisassiorfiit aalisarsinnaanermut uppernarsaateqanngitsut ilanngullugit pisissanik tuneqartarneri uggornartuusoq, Brian Buus Pedersen oqarpoq.
- Misileraalluni avaleraasartoorniarneq siorna pitsaasutut oqaatigineqarsinnaasoq eqqarsaatigalugu, ukioq manna pisassat tamakkersimagaluarutsigilluunniit tamanna Nunatta karsianut ajunaarutaassasoq natsorsuutigineqarsinnaavoq. Taamaattumik isumaqarpunga tunisassiorfiit kikkuugaluarpataluunniit pisassinneqatut ilumut aalisarsinnaanissaat qulakkeeqqaarlugu aatsaat tunineqartarnissaat pisariaqarpoq.
Kalaallit Nunaanni sulisitsisut peqatigiiffianni, GE-mi pisortaq, Brian Buus Pedersen oqarpoq.
Taanna aamma oqarpoq, tunisassiorfik KNT Aps, aningaasanik 2,5 millioner koruuninik akiitsoqartoq, 4.250 tonsinik pisassinneqarsimanera akuerineqarsinnaanngitsoq. Brian Buus Pedersenip assertuutitut oqaatigaa, suliffeqarfiit sanaartugassanut neqerooruteqartut oqartussanut akiitsoqannginnissaat piumasaqaataasarmat tamanna aalisarnermi aamma atuutsinneqartariaqaraluartoq.
